(krıl va lotında)
Фейсбукда Абдулазиз (Умар) Аслан тахаллуси билан блогпостлар ёзадиган Лазиз Асадов қарамоғидаги қизига мактабда ҳижоби (рўмоли) сабабли босим ўтказилаётгани туфайли 2019 йил 6 сентябр куни Тошкент шаҳар Учтепа туманидаги 107-мактаб маъмурияти билан учрашиш учун борган.
Директор хонасида айни мавзуда – Вазирлар Маҳкамасининг 666-сонли қарори ва унга илова қилинган низом бўйича ўзаро суҳбат кетаётганида ўзини таништирмаган, кимлиги номаълум бир неча шахс у кишига ҳужум қилиб, қўлини орқасига қайириб, аввал мактаб ҳовлисига, ундан кўчага мажбурлаб олиб чиқишган ва қўлига кишан солиб, ўша ерда турган ранги оқ, давлат рақами 01 Z 996 AB бўлган Матиз автомашинасига зўрлик билан ўтқизиб, соат 15:10 лар атрофида номаълум томонга олиб кетишган. Кейинроқ уларнинг Учтепа туман ИИБ Терроризм ва экстремизмга қарши кураш бўлими ходимлари эканлиги маълум бўлган.
Аммо Лазиз Асадовни ИИБга олиб боришда унга ҳеч қандай ҳужжат, гувоҳнома кўрсатилмаган. Уни бир неча соат давомида ИИБда ушлаб туришган, “ички ишлар ходимларининг қонуний талабига бўйсунмаслик” асосида тушунтириш хати олиб, ишини судга оширишга ҳаракат қилишган.
Бироқ Лазиз Асадовга айблов қўйилишига унинг мактабдаги суҳбат жараёнини Фейсбук ижтимоий тармоғида жонли намойиш қилгани ва бунинг ортидан кўтарилган шов-шув, шунингдек, оила аъзоларининг Тошкент шаҳар ИИББ ва прокуратурасига уни “номаълум шахслар ўғрилаб кетгани” ҳақида берган аризаси тўсқинлик қилган. Аввал ИИБ, кейин прокуратура ходимлари билан суҳбатдан кейин Асадовдан тушунтириш хати олиниб, кеч соат 21:10 га яқин қўйиб юборилган, унга “соқолини бир энлик қисқартириб, эртасига ИИБга келиб-кетиш” буюрилган.
Feysbukda Abdulaziz (Umar) Aslan taxallusi bilan blogpostlar yozadigan Laziz Asadov qaramog‘idagi qiziga maktabda hijobi (ro‘moli) sababli bosim o‘tkazilayotgani tufayli 2019 yil 6 sentyabr kuni Toshkent shahar Uchtepa tumanidagi 107-maktab ma’muriyati bilan uchrashish uchun borgan.
Direktor xonasida ayni mavzuda – Vazirlar Mahkamasining 666-sonli qarori va unga ilova qilingan nizom bo‘yicha o‘zaro suhbat ketayotganida o‘zini tanishtirmagan, kimligi noma’lum bir necha shaxs u kishiga hujum qilib, qo‘lini orqasiga qayirib, avval maktab hovlisiga, undan ko‘chaga majburlab olib chiqishgan va qo‘liga kishan solib, o‘sha yerda turgan rangi oq, davlat raqami 01 Z 996 AB bo‘lgan Matiz avtomashinasiga zo‘rlik bilan o‘tqizib, soat 15:10 lar atrofida noma’lum tomonga olib ketishgan. Keyinroq ularning Uchtepa tuman IIB Terrorizm va ekstremizmga qarshi kurash bo‘limi xodimlari ekanligi ma’lum bo‘lgan.
Ammo Laziz Asadovni IIBga olib borishda unga hech qanday hujjat, guvohnoma ko‘rsatilmagan. Uni bir necha soat davomida IIBda ushlab turishgan, “ichki ishlar xodimlarining qonuniy talabiga bo‘ysunmaslik” asosida tushuntirish xati olib, ishini sudga oshirishga harakat qilishgan.
Biroq Laziz Asadovga ayblov qo‘yilishiga uning maktabdagi suhbat jarayonini Feysbuk ijtimoiy tarmog‘ida jonli namoyish qilgani va buning ortidan ko‘tarilgan shov-shuv, shuningdek, oila a’zolarining Toshkent shahar IIBB va prokuraturasiga uni “noma’lum shaxslar o‘g‘rilab ketgani” haqida bergan arizasi to‘sqinlik qilgan. Avval IIB, keyin prokuratura xodimlari bilan suhbatdan keyin Asadovdan tushuntirish xati olinib, kech soat 21:10 ga yaqin qo‘yib yuborilgan, unga “soqolini bir enlik qisqartirib, ertasiga IIBga kelib-ketish” buyurilgan.
https://sof.uz/news/show/23139-qiziga-rumoli-sababli-bosim-utkazilayotg
