(KRIL VA LOTINDA)
Вазирлар Маҳкамаси ҳузуридаги Дин ишлари бўйича қўмита раисининг яна бир ўринбосари тайинланди. Бу ҳақда бош вазир Абдулла Арипов томонидан 2019 йил 7 сентябрь куни имзоланган қарорда айтилади.
Ҳужжат билан Дилбар Муҳамедхоновна Ғуломова Вазирлар Маҳкамаси ҳузуридаги Дин ишлари бўйича қўмита раисининг ўринбосари лавозимини эгаллади.
Дилбар Ғуломова 1995 йилдан Ўзбекистон хотин-қизлар қўмитасининг раиси бўлиб ишлаган, 2000 йилда Олий Мажлис сессиясида Ўзбекистон Республикаси бош вазирининг ўринбосари — Ўзбекистон хотин-қизлар қўмитасининг раиси этиб тасдиқланган. Ҳар икки лавозимни 2004 йилга қадар эгаллаган. 1999-2004 йилларда Олий Мажлис депутати бўлган.
Вазирлар Маҳкамаси ҳузуридаги Дин ишлари бўйича қўмита ҳар бир шахснинг виждон ва диний эътиқод эркинлиги ҳуқуқи, фуқароларнинг динга бўлган муносабатидан қатъи назар тенглигини таъминлаш, шунингдек диний ташкилотлар фаолияти билан боғлиқ муносабатларни тартибга солиш соҳасидаги вазифаларни ҳал этиш ваколати берилган давлат бошқаруви органи ҳисобланади.
Аввалроқ, президент қарори билан Дин ишлари бўйича қўмитанинг янгиланган асосий вазифалари белгиланганди.
Ундан олдин, Дин ишлари бўйича қўмита раҳбарияти ишдан олингани хабар берилганди. Шундан сўнг, Абдуғофур Аҳмедов қўмитанинг янги раиси, Дилшод Эшнаев қўмита раисининг ўринбосари – Диний ижтимоий жараёнларни ўрганиш ахборот-таҳлил маркази директори лавозимини эгаллади.
Vazirlar Mahkamasi huzuridagi Din ishlari bo‘yicha qo‘mita raisining yana bir o‘rinbosari tayinlandi. Bu haqda bosh vazir Abdulla Aripov tomonidan 2019 yil 7 sentyabr kuni imzolangan qarorda aytiladi.
Hujjat bilan Dilbar Muhamedxonovna G‘ulomova Vazirlar Mahkamasi huzuridagi Din ishlari bo‘yicha qo‘mita raisining o‘rinbosari lavozimini egalladi.
Dilbar G‘ulomova 1995 yildan O‘zbekiston xotin-qizlar qo‘mitasining raisi bo‘lib ishlagan, 2000 yilda Oliy Majlis sessiyasida O‘zbekiston Respublikasi bosh vazirining o‘rinbosari — O‘zbekiston xotin-qizlar qo‘mitasining raisi etib tasdiqlangan. Har ikki lavozimni 2004 yilga qadar egallagan. 1999-2004 yillarda Oliy Majlis deputati bo‘lgan.
Vazirlar Mahkamasi huzuridagi Din ishlari bo‘yicha qo‘mita har bir shaxsning vijdon va diniy e’tiqod erkinligi huquqi, fuqarolarning dinga bo‘lgan munosabatidan qat’i nazar tengligini ta’minlash, shuningdek diniy tashkilotlar faoliyati bilan bog‘liq munosabatlarni tartibga solish sohasidagi vazifalarni hal etish vakolati berilgan davlat boshqaruvi organi hisoblanadi.
Avvalroq, prezident qarori bilan Din ishlari bo‘yicha qo‘mitaning yangilangan asosiy vazifalari belgilangandi.
Undan oldin, Din ishlari bo‘yicha qo‘mita rahbariyati ishdan olingani xabar berilgandi. Shundan so‘ng, Abdug‘ofur Ahmedov qo‘mitaning yangi raisi, Dilshod Eshnayev qo‘mita raisining o‘rinbosari – Diniy ijtimoiy jarayonlarni o‘rganish axborot-tahlil markazi direktori lavozimini egalladi.
