Ироқдан 64 нафар ўзбек бола Тошкентга олиб келинди. Iroqdan 64 nafar o‘zbek bola Toshkentga olib kelindi

(krıl va latında)

Ўзбекистон Ироқдан 64 нафар ўзбек болани олиб келди. Болалар 10 октябрь куни Тошкент аэропортида кутиб олинди.

ЎзАнинг хабар беришича, болаларни ватанига қайтариш Ироқ ҳукумати ва ЮНИСЕФ билан ҳамкорликда амалга оширилди. Болаларни Ўзбекистонга қайтариш юзасидан президент топшириғига кўра, махсус ишчи гуруҳи тузилган эди.

Хабарда айтилишича, «Меҳр 2» деб номланган мазкур инсонпарварлик амалиёти доирасида Ўзбекистонга 39 нафар ўғил ва 25 нафар қиз бола қайтарилган. Уларнинг 14 нафари 3 ёшгача бўлган ҳамда 2 нафари ота-онасидан айрилган болалардир.

Маълум қилинишича, болаларнинг ота-оналари Ироқда 10 йилдан 20 йилгача ёки умрбод қамоққа ҳукм қилинган.

Ишчи гуруҳ томонидан “қамоқ жазосини ўтаётган ўзбекистонлик аёллар билан тегишли суҳбатлар ўтказилди ва фарзандларини Ўзбекистонга олиб келиш бўйича уларнинг розиликлари олинган”.

“Эндиликда болалар барча қулайликларга эга бўлган соғломлаштириш муассасасига жойлаштирилиши кутилмоқда. Мутахассислар уларга ҳар томонлама тиббий, психологик ва ижтимоий ёрдам кўрсатишлари кўзда тутилган. Сиҳатгоҳда болалар учун иссиқ овқатлар ташкил этилиб, уларга янги кийим-кечаклар берилиши айтилмоқда”, дейилади хабарда.

Бундан олдинги операция

Ўзбекистонлик 156 аёл ва бола “Меҳр” инсонпарварлик операцияси доирасида 30 май куни махсус авиарейс билан Тошкентга олиб келинган эди. ​

Ўзбекистон президенти матбуот хизматининг хабар қилишича, булар “алдов оқибатида ўзга юртга бориб қолиб, оғир ҳаётий даврни бошидан ўтказган” инсонлардир.

Баёнотда бу инсонларга ҳукумат томонидан “тиббий, психологик, моддий ва маънавий ёрдам кўрсатилиши, уларнинг тинч ҳаётга қайтиб, жамиятга мослашиши, таълим ва ижтимоий дастурларда иштирок этиши учун зарур шароит яратилиши, бошпана ва иш билан таъминлаш чоралари кўрилиши” айтилган.

Бу аёллар ва болалар Сурия ва Ироқдаги актив қуролли низолар ўтган ҳудудда бўлганми, хусусан, ИШИД (“Ислом давлати” экстремистик гуруҳи) сафида жанг қилган ​жангариларнинг оиласими – бу ҳақда ўз вақтида аниқ маълумот берилмаган)

Ўзбекистон Хотин-қизлар қўмитаси раиси Танзила Норбоева Яқин Шарқдаги низоли ҳудудлардан аёллар ва болаларни олиб келиш амалиёти давом этишини билдирди.

Gazeta.uz нашрига берган шарҳида Норбоева 30 май куни қайтарилганларга шифокорлар ва психологлар ёрдам бераётганини айтди. Танзила Норбоеванинг аниқлик киритишича, келганларнинг 48 нафари аёл, 106 нафари болалардир.

O‘zbekiston Iroqdan 64 nafar o‘zbek bolani olib keldi. Bolalar 10 oktyabr kuni Toshkent aeroportida kutib olindi.

O‘zAning xabar berishicha, bolalarni vataniga qaytarish Iroq hukumati va YuNISEF bilan hamkorlikda amalga oshirildi. Bolalarni O‘zbekistonga qaytarish yuzasidan prezident topshirig‘iga ko‘ra, maxsus ishchi guruhi tuzilgan edi.

Xabarda aytilishicha, «Mehr 2» deb nomlangan mazkur insonparvarlik amaliyoti doirasida O‘zbekistonga 39 nafar o‘g‘il va 25 nafar qiz bola qaytarilgan. Ularning 14 nafari 3 yoshgacha bo‘lgan hamda 2 nafari ota-onasidan ayrilgan bolalardir.

Ma’lum qilinishicha, bolalarning ota-onalari Iroqda 10 yildan 20 yilgacha yoki umrbod qamoqqa hukm qilingan.

Ishchi guruh tomonidan “qamoq jazosini o‘tayotgan o‘zbekistonlik ayollar bilan tegishli suhbatlar o‘tkazildi va farzandlarini O‘zbekistonga olib kelish bo‘yicha ularning roziliklari olingan”.

“Endilikda bolalar barcha qulayliklarga ega bo‘lgan sog‘lomlashtirish muassasasiga joylashtirilishi kutilmoqda. Mutaxassislar ularga har tomonlama tibbiy, psixologik va ijtimoiy yordam ko‘rsatishlari ko‘zda tutilgan. Sihatgohda bolalar uchun issiq ovqatlar tashkil etilib, ularga yangi kiyim-kechaklar berilishi aytilmoqda”, deyiladi xabarda.

Bundan oldingi operatsiya

O‘zbekistonlik 156 ayol va bola “Mehr” insonparvarlik operatsiyasi doirasida 30 may kuni maxsus aviareys bilan Toshkentga olib kelingan edi. ​

O‘zbekiston prezidenti matbuot xizmatining xabar qilishicha, bular “aldov oqibatida o‘zga yurtga borib qolib, og‘ir hayotiy davrni boshidan o‘tkazgan” insonlardir.

Bayonotda bu insonlarga hukumat tomonidan “tibbiy, psixologik, moddiy va ma’naviy yordam ko‘rsatilishi, ularning tinch hayotga qaytib, jamiyatga moslashishi, ta’lim va ijtimoiy dasturlarda ishtirok etishi uchun zarur sharoit yaratilishi, boshpana va ish bilan ta’minlash choralari ko‘rilishi” aytilgan.

Bu ayollar va bolalar Suriya va Iroqdagi aktiv qurolli nizolar o‘tgan hududda bo‘lganmi, xususan, IShID (“Islom davlati” ekstremistik guruhi) safida jang qilgan ​jangarilarning oilasimi – bu haqda o‘z vaqtida aniq ma’lumot berilmagan)

O‘zbekiston Xotin-qizlar qo‘mitasi raisi Tanzila Norboyeva Yaqin Sharqdagi nizoli hududlardan ayollar va bolalarni olib kelish amaliyoti davom etishini bildirdi.

Gazeta.uz nashriga bergan sharhida Norboyeva 30 may kuni qaytarilganlarga shifokorlar va psixologlar yordam berayotganini aytdi. Tanzila Norboyevaning aniqlik kiritishicha, kelganlarning 48 nafari ayol, 106 nafari bolalardir.

Alakalı yazılar

Yorum yazın