You are here

Özbek-Tacik ortak bildirisi yayınlandı (Özbekçe)

Mirziyoyev va Rahmonning qo‘shma bayonoti qabul qilindi, unda Rog‘un GES ham tilga olingan

Foto: Prezident matbuot xizmati
Tojikiston Respublikasi Prezidenti Imomali Rahmonning taklifiga binoan O‘zbekiston Respublikasi Prezidenti Shavkat Mirziyoyev 2018 yil 9-10 mart kunlari davlat tashrifi bilan Tojikiston Respublikasida bo‘ldi.

Ochiq, do‘stona va konstruktiv muhitda o‘tgan samarali muzokaralar davomida davlat rahbarlari O‘zbekiston Respublikasi bilan Tojikiston Respublikasi o‘rtasidagi munosabatlarning hozirgi holatidagi muhim masalalarni, siyosiy, savdo-iqtisodiy, transport-kommunikatsiyaviy, madaniy-gumanitar va boshqa sohalarda ikki tomonlama keng qamrovli hamkorlikni yanada kengaytirish va chuqurlashtirish istiqbollarini, shuningdek, o‘zaro qiziqish uyg‘otadigan dolzarb mintaqaviy va xalqaro muammolarni batafsil muhokama qildilar.

O‘zbekiston TIV axborot xizmati tomonidan O‘zbekiston Prezidenti Shavkat Mirziyoyev va Tojikiston Prezidenti Imomali Rahmonning do‘stlik va ahil qo‘shnichilikni mustahkamlash to‘g‘risidagi qo‘shma bayonoti matni e’lon qilindi.

Davlat rahbarlari so‘nggi yillarda erishilgan davlatlararo muloqotning yuqori darajasini, shuningdek, ikki mamlakat o‘rtasidagi hamkorlikni rivojlantirishda kuzatilayotgan ijobiy o‘sish sur’atini mamnuniyat bilan qayd etgan holda,

ikki mamlakat xalqlari o‘rtasida do‘stlik, ahil qo‘shnilik va o‘zaro hurmat tamoyillariga qat’iy asoslangan ko‘p asrlik tarixiy va madaniy umumiylikdan kelib chiqib,

O‘zbekiston bilan Tojikiston o‘rtasidagi konstruktiv va o‘zaro manfaatli hamkorlik ikki mamlakat xalqlarining uzoq muddatli manfaatlariga javob berishiga, shuningdek, butun Markaziy Osiyo mintaqasida tinchlik, barqarorlik, xavfsizlik va izchil rivojlanishni ta’minlashda asosiy omil bo‘lishiga ishonch bildirgan holda,

xalqaro huquqning umume’tirof etilgan prinsiplari va normalariga, shuningdek, BMT Nizomi maqsad va prinsiplariga, shu jumladan, mustaqillikni o‘zaro hurmat qilish, suverenitet, hududiy yaxlitlik, chegaralarning daxlsizligi, bir-birlarining ichki ishlariga aralashmaslik, teng huquqlilik va o‘zaro manfaatdorlik prinsiplariga sodiqliklarini yana bir bor tasdiqlab,

O‘zbekiston-Tojikiston munosabatlarini yanada kengaytirish va chuqurlashtirishga, erishilgan kelishuvlarni o‘z vaqtida va to‘liq amalga oshirilishini ta’minlashga intilgan holda, quyidagilar to‘g‘risida bayonot beradilar:

1. Davlat rahbarlari tinchlik va barqarorlikni saqlash va mustahkamlash, butun mintaqa taraqqiyoti va ravnaqini ta’minlashda yuksak mas’uliyatlarini chuqur anglab, 2000 yil 15 iyunda imzolangan O‘zbekiston Respublikasi bilan Tojikiston Respublikasi o‘rtasida abadiy do‘stlik to‘g‘risida Shartnoma qoidalariga tayangan holda, an’anaviy do‘stlik, ahil qo‘shnilik va hamkorlik munosabatlarini imkon qadar yanada rivojlantirish va chuqurlashtirishga qat’iy tayyor ekanliklarini tasdiqlaydilar.

Davlat rahbarlari tashrif davomida imzolangan O‘zbekiston Respublikasi bilan Tojikiston Respublikasi o‘rtasida o‘zbek-tojik Davlat chegarasining alohida uchastkalari to‘g‘risida Shartnoma bunga xizmat qilishiga ishonch bildirdilar.

Davlat rahbarlari O‘zbekiston Respublikasi bilan Tojikiston Respublikasi o‘rtasidagi Davlat chegarasini do‘stlik, ahil qo‘shnilik va hamkorlik chegarasiga aylantirishning muhimligini hamda bu ikki qardosh xalqlarning hayotiy muhim manfaatlariga javob berishini ta’kidladilar.

2. Tomonlar ikki davlat o‘rtasidagi munosabatlarni izchil kengaytirish uchun konstruktiv siyosiy muloqotning muhimligini qayd etgan holda, oliy, yuqori va boshqa darajalarda aloqalarni yanada kengaytirish tarafdori ekanliklarini ta’kidladilar.

Prezidentlar uzoq muddatli hamkorlikning huquqiy asoslarini yanada rivojlantirish va hamkorlikning barcha yo‘nalishlaridagi mavjud yuksak salohiyatni imkon qadar to‘la ro‘yobga chiqarish maqsadida yaqin istiqbolda ikki davlat o‘rtasida Strategik sheriklik to‘g‘risidagi shartnomani ishlab chiqishga kelishib oldilar.

3. Tojikiston Respublikasi Prezidenti Imomali Rahmon O‘zbekiston Respublikasi Prezidenti Shavkat Mirziyoyev tomonidan O‘zbekistonda amalga oshirilayotgan, mamlakat salohiyatini mustahkamlash, milliy iqtisodiyotni rivojlantirish, xalq farovonligini oshirish va mamlakatning xalqaro nufuzini mustahkamlashga qaratilgan keng ko‘lamli o‘zgarishlarni qo‘llab-quvvatlashini bildirdi.

Tojikiston Respublikasi rahbariyati mintaqaviy hamkorlikni faollashtirish, xususan, Markaziy Osiyo davlatlari rahbarlarining maslahatlashuvlari bo‘yicha uchrashuvlarni muntazam tashkil qilish yuzasidan O‘zbekiston Respublikasi tashabbuslarini qo‘llab-quvvatlashini bildirdi.

4. O‘zbekiston Respublikasi Prezidenti Shavkat Mirziyoyev Tojikiston Respublikasi Prezidenti Imomali Rahmonning Tojikiston ijtimoiy-iqtisodiy rivojlanishini ta’minlash va mintaqaviy xavfsizlikni mustahkamlash bo‘yicha sa’y-harakatlarini qo‘llab-quvvatlashini bildirdi.

O‘zbekiston rahbariyati Tojikistonning 2018-2028 yillarda «Suv barqaror rivojlanish uchun» xalqaro harakatlar o‘n yilligi to‘g‘risidagi tashabbusini qo‘llab-quvvatlashini bildirdi.

5. Prezidentlar O‘zbekiston Respublikasi bilan Tojikiston Respublikasi o‘rtasida o‘zaro manfaatli savdo-iqtisodiy hamkorlikni yanada kengaytirishning strategik xususiyatini qayd etdilar.

Tomonlar o‘zaro savdoda kuzatilayotgan ijobiy o‘sish sur’atini mamnuniyat bilan qayd etdilar hamda ikki tomonlama tovar aylanmasi nomenklaturasini diversifikatsiya qilish va yaqin yillarda uning hajmini 500 mln. dollarga yetkazish uchun ulkan salohiyat mavjudligini ta’kidladilar.

Shu munosabat bilan Tomonlar o‘zaro savdo nomenklaturasini yanada kengaytirish muhimligini tasdiqladilar. Tomonlar sanoat kooperatsiyalarini rivojlantirish, qo‘shma korxonalar va savdo uylarini yaratish, tashqi savdo infratuzilmalari va eksport-import operatsiyalarini qo‘llab-quvvatlash mexanizmlarini faol rivojlantirish, shuningdek, o‘zarolik asosida biznes-forumlar va sanoat mahsulotlarining milliy ko‘rgazmalarini tashkil qilish uchun ulkan salohiyat mavjudligini qayd etdilar.

Tomonlar ikkala mamlakat iqtisodiyotiga investitsiyalarni jalb qilish va rag‘batlantirish bo‘yicha birgalikdagi sa’y-harakatlarini amalga oshiradilar. Shu munosabat bilan davlat rahbarlari O‘zbekiston Respublikasi Hukumati bilan Tojikiston Respublikasi Hukumati o‘rtasida investitsiyalarni rag‘batlantirish va o‘zaro himoya qilish to‘g‘risida Bitim imzolanganini mamnuniyat bilan qayd etadilar.

Tomonlar ishbilarmon doiralar o‘rtasida aloqalarni kengaytirish hamda salmoqli savdo bitimlari va shartnomalarni tuzishga ko‘maklashgan o‘zaro milliy ko‘rgazmalar va biznes-forumlar 2017-yilda Toshkent va Dushanbe shaharlarida muvaffaqiyatli o‘tkazilganligini qayd etdilar.

Bo‘lib o‘tgan oliy darajadagi tashrif doirasida Dushanbe shahrida tashkil qilingan «O‘zbekistonda ishlab chiqarilgan» ko‘rgazmasi va O‘zbekiston-Tojikiston qo‘shma biznes-forumiga yuqori baho berildi.

Ikki davlat rahbarlari 2018-yil 10-yanvarda Dushanbe shahrida bo‘lib o‘tgan Savdo-iqtisodiy hamkorlik bo‘yicha hukumatlararo komissiyaning beshinchi yig‘ilishi yakunlarini ijobiy baholadilar hamda savdo-iqtisodiy va madaniy-gumanitar hamkorlikni rivojlantirish bo‘yicha barcha masalalarni hal qilishda, shuningdek, hamkorlikning yangi istiqbolli yo‘nalishlarini aniqlashda uning samarali mexanizm sifatidagi rolini yanada kuchaytirish zarurligini ta’kidladilar.

Tomonlar mazkur tashrif davomida imzolangan O‘zbekiston Respublikasi Hukumati bilan Tojikiston Respublikasi Hukumati o‘rtasida mintaqalararo hamkorlik to‘g‘risida Bitimga muvofiq savdo-iqtisodiy, ilmiy-texnikaviy va madaniy-gumanitar sohalarda ikki davlat mintaqalari o‘rtasidagi aloqalarni kengaytirish va chuqurlashtirish zarurligini qayd etdilar.

6. Davlat rahbarlari ikki mamlakatning umumiy transport-kommunikatsiyaviy imkoniyatlari va tranzit salohiyatidan imkon qadar to‘la foydalanishga alohida ahamiyat bergan holda, transport qatnovi sohasidagi hamkorlikni jadallashtirish va mavjud avtomobil, temir yo‘l, havo qatnovi tranzit yo‘nalishlarini qayta tiklash va yangilarini yaratish masalalarini ishlab chiqish yuzasidan tegishli idoralarga topshiriq berdilar.

Prezidentlar tomonidan 2017 yilning aprel oyida Toshkent shahri bilan Dushanbe shahri o‘rtasida to‘g‘ridan-to‘g‘ri aviaqatnovning ochilishi katta mamnuniyat bilan qayd etildi.

Tomonlar ikki mamlakat shaharlari o‘rtasida mavjud avtomobil, temir yo‘l va havo qatnovi yo‘nalishlarini qayta ishga tushirish va yangilarini ochish O‘zbekiston bilan Tojikiston o‘rtasida madaniy-gumanitar va savdo-iqtisodiy munosabatlarning faollashuviga ko‘maklashishini ta’kidladilar.

O‘zbekiston Respublikasi va Tojikiston Respublikasi temir yo‘llari ishtirokida tashqi savdo yuklarini tashishda raqobatbardosh tariflarni shakllantirish masalalari bo‘yicha yanada keng hamkorlik qilish amaldagi transport yo‘laklarini samarali ish yuklamasi bilan ta’minlashga imkon yaratishi qayd etildi.

Shu munosabat bilan ikki davlat rahbarlari «G‘alaba – Amuzang» uchastkasida temir yo‘l qatnovining qayta ishga tushirilganini mamnuniyat bilan ta’kidladilar.

7. Ikkala davlat rahbarlari madaniy-gumanitar sohada, ilmiy muassasalar, o‘quv yurtlari, ommaviy axborot vositalari, ijodiy va sport jamoalari, yoshlar va xotin-qizlar tashkilotlari, kasaba uyushmalari va boshqa fuqarolik jamiyati institutlari o‘rtasida to‘g‘ridan-to‘g‘ri aloqalar va tajriba almashinuvni rivojlantirish bo‘yicha hamkorlikning ustuvor xususiyatini qayd etdilar.

Davlat rahbarlari tomonidan 2017 yilda Tojikiston Respublikasida O‘zbekiston Respublikasi madaniyati kunlari va O‘zbekiston Respublikasida Tojikiston Respublikasi madaniyati kunlari muvaffaqiyatli o‘tkazilganiga yuqori baho berildi.

Davlat rahbarlari ta’lim va fan sohasida o‘zaro aloqalarni, shu jumladan, ikki mamlakat oliy o‘quv yurtlari va fanlar akademiyalari o‘rtasida hamkorlikni rivojlantirish orqali kengaytirish zarurligini qayd etdilar.

Tomonlar ilmiy va pedagogik kadrlarni tayyorlash, tadqiqotchilar, mutaxassislar, professor-o‘qituvchi kadrlar va talabalar bilan almashinuv, shuningdek, ta’lim to‘g‘risidagi hujjatlar, malaka va ilmiy darajalarni o‘zaro tan olish masalalari bo‘yicha axborot almashinuvi sohalarida hamkorlik qiladilar va qulay sharoitlar yaratadilar.

8. Tomonlar bundan buyon ham ikki davlat hududida milliy madaniy markazlar faoliyati uchun ona tili, madaniyati, an’ana va urf-odatlarini saqlash hamda rivojlantirishda qulay sharoitlar yaratib beradilar, bir davlat hududidagi boshqa davlat fuqarolarining huquq va manfaatlarini ta’minlash bo‘yicha chora-tadbirlarni amalga oshiradilar.

Ikki mamlakat Prezidentlari o‘zbek tilini Tojikistonda hamda tojik tilini O‘zbekistonda o‘rganish va o‘rgatishni takomillashtirish, o‘zbek va tojik tillarida o‘qitiladigan umumiy ta’lim o‘quv muassasalari tizimini kengaytirish, o‘quv va badiiy adabiyotlar, davriy va ilmiy nashrlar bilan almashinuv bo‘yicha hamkorlik o‘rnatish, ikki mamlakatning mumtoz adabiyot vakillari va zamonaviy mualliflari asarlarini tarjima qilishni qo‘llab-quvvatlash masalalariga alohida e’tibor qaratadilar.

Tojikiston tomoni Samarqand shahrida ikki xalqning buyuk vakillari A.Navoiy va A.Jomiyga yodgorlik o‘rnatilishini, shuningdek, Samarqand shahridagi zamonaviy tojik adabiyotining asoschisi S.Ayniy muzeyining rekonstruksiya qilinishini mamnuniyat bilan qarshi oldi.

O‘zbekiston tomoni, o‘z navbatida, Tojikiston Respublikasi Hukumatining Dushanbe shahrida A.Navoiy nomidagi parkni barpo qilish va unda A.Navoiy va A.Jomiyga yodgorlik o‘rnatish haqidagi qarorini mamnuniyat bilan qarshi oldi.

9. Tomonlar O‘zbekiston-Tojikiston Davlat chegarasidan o‘tkazish punktlari faoliyatining qayta tiklanganini mamnuniyat bilan e’tirof etib, ularning to‘laqonli faoliyat yuritishi ikkala xalq manfaatlariga xizmat qilishini hamda ikki tomonlama munosabatlarni yanada rivojlantirish uchun qulay sharoitlar yaratishini ta’kidladilar.

Davlat rahbarlari O‘zbekiston va Tojikiston xalqlari o‘rtasidagi aloqalarni mustahkamlashga ko‘maklashadigan, ikki davlat fuqarolarining 30 kunga qadar o‘zaro safarlari uchun vizasiz rejimning joriy qilinayotganini mamnuniyat bilan qayd etdilar.

10. Prezidentlar terrorizm va ekstremizm, narkotrafik, transmilliy uyushgan jinoyatchilik, noqonuniy qurol savdosi, ommaviy qirg‘in qurollarini tarqatish, noqonuniy migratsiya hamda boshqa mintaqaviy va xalqaro xavfsizlikka oid xuruj va tahdidlarga qarshi kurashishda ham ikki tomonlama, ham xalqaro formatlarda hamkorlikni mustahkamlashga, shuningdek, o‘z hududlarida Tomonlarning milliy xavfsizlik manfaatlariga qarshi qaratilgan noqonuniy faoliyatni amalga oshirishga yo‘l qo‘ymaslikka tayyor ekanliklarini tasdiqladilar.

Ushbu maqsadlarda O‘zbekiston va Tojikiston tegishli idoralarining maslahatlashuvlarini o‘tkazish orqali hamkorlikni takomillashtirish bo‘yicha barcha zaruriy choralar ko‘riladi.

11. Ikki davlat rahbarlari harbiy va harbiy-texnikaviy sohalarda, shuningdek, harbiy ta’lim sohasida o‘zaro manfaatli asoslarda hamkorlikni rivojlantirishga tayyor ekanliklarini tasdiqladilar.

12. Prezidentlar ikki mamlakatning chegaraoldi hududlarida muhandislik to‘siqlari uchastkalarini zararsizlantirish masalasi bo‘yicha O‘zbekiston-Tojikiston qo‘shma ishchi guruhi tuzilishini mamnuniyat bilan e’tirof etdilar va mazkur ishlarni 2018-2019 yillarda yakunlash lozimligini qayd etdilar.

13. Prezidentlar favqulodda vaziyatlarning oldini olish va ularni bartaraf qilish sohasidagi aloqalarni chuqurlashtirish, amaliy hamkorlikni kengaytirish va aniq tadbirlarni amalga oshirish muhimligini ta’kidladilar.

14. Tomonlar Markaziy Osiyoda tinchlik, barqarorlik, xavfsizlik va izchil rivojlanishni ta’minlashga doir dolzarb masalalar bo‘yicha pozitsiyalarining bir-biriga mos kelishi yoki yaqinligini tasdiqladilar.

Davlat rahbarlari Markaziy Osiyoda barcha ichki mintaqaviy muammolarni hal etish mintaqa davlatlarining faqatgina o‘zlari tomonidan ochiq va konstruktiv muloqot orqali teng huquqlilik, o‘zaro manfaatdorlik va bir-birlarining manfaatlarini hurmat qilish va hisobga olish prinsiplari asosida amalga oshirilishi mumkin va lozimligini ta’kidladilar.

15. Prezidentlar Markaziy Osiyo farovonligining asosiy omillaridan biri mintaqaning barcha davlatlari manfaatlarini hisobga olgan holda suv-energetika resurslaridan kompleks foydalanish ekanligini ta’kidladilar. Ochiq muloqot, o‘zaro anglashuvni mustahkamlash va konstruktiv hamkorlikni rivojlantirish, o‘zaro maqbul, adolatli va oqilona yechimlarni topish muhimligi qayd etildi.

Tomonlar suv resurslaridan oqilona va adolatli foydalanish sohasida mintaqaviy sheriklikni rivojlantirishdan o‘zaro manfaatdor ekanliklarini bildirdilar hamda Markaziy Osiyo uchun suv-energetika muammolarini hal etishda mavjud va barpo etilayotgan gidroenergetik inshootlar muhim ahamiyatga ega ekanligini ta’kidladilar.

Shu munosabat bilan O‘zbekiston tomoni Tojikiston Respublikasida gidrotexnik inshootlar, shu jumladan, Rog‘un gidroelektr stansiyasining qurilishida umum’tirof etilgan xalqaro normalar va mazkur ob’ektlarni qurish bo‘yicha standartlarga rioya qilinishini hisobga olgan holda ishtirok etish imkoniyatini har tomonlama ko‘rib chiqishga tayyor ekanligini bildirdi.

Davlat rahbarlari mintaqadagi barcha davlatlarning manfaatlarini hisobga olgan holda konstruktiv muloqot o‘rnatishga ko‘maklashadigan Markaziy Osiyo transchegaraviy suv resurslaridan kompleks tarzda va samarali foydalanish bo‘yicha huquqiy mexanizmlarni takomillashtirish zarurligini ta’kidladilar.

Tomonlar Markaziy Osiyo xalqaro ekologik forumi (Toshkent, 2018 yil 5-8 iyun) va 2018-2028 yillarda «Suv barqaror rivojlanish uchun» xalqaro harakatlar o‘n yilligi bo‘yicha oliy darajadagi xalqaro konferensiya (Dushanbe, 2018 yil 20-22 iyun) o‘tkazilishini mamnuniyat bilan e’tirof etadilar.

16. Prezidentlar xalqaro masalalarda har qanday qarama-qarshilik va kelishmovchiliklarni faqatgina siyosiy yo‘l bilan, muzokaralar va boshqa tinch vositalar orqali hal qilish mumkin, degan yakdil fikrdalar.

Tomonlar xalqaro maydonda ikki tomonlama hamkorlikni davom ettirish va mustahkamlash uchun salmoqli salohiyat mavjudligini qayd etdilar hamda Birlashgan Millatlar Tashkiloti, Mustaqil Davlatlar Hamdo‘stligi, Shanxay hamkorlik tashkiloti, Islom hamkorlik tashkiloti va boshqa xalqaro tashkilotlar doirasida O‘zbekiston va Tojikiston hamkorligini yanada rivojlantirishga o‘zaro intilishlarini bildirdilar.

Prezidentlar BMT global xavfsizlikni saqlashga ko‘maklashadigan yetakchi universal xalqaro tuzilma, shuningdek, davlatlararo va xalqaro muammolarni hal qilish uchun asosiy maydon bo‘lib qolmoqda, degan yakdil fikrdalar. Tomonlar xalqaro munosabatlarda uning markaziy muvofiqlashtiruvchi rolini mustahkamlash tarafdori ekanliklarini tasdiqladilar.

Tomonlar «Tinchlik jarayoni, xavfsizlik sohasida hamkorlik va mintaqaviy sheriklik» nomli Afg‘oniston bo‘yicha oliy darajadagi xalqaro konferensiya (Toshkent shahri, 2018 yil 26-27 mart) hamda Terrorizm va radikalizmga qarshi kurashish masalalari bo‘yicha oliy darajadagi xalqaro konferensiya (Dushanbe shahri, 2018 yil 3-4 may) o‘tkazilishini mamnuniyat bilan e’tirof etadilar.

Tojikiston tomoni O‘zbekiston tomonining BMT Bosh Assambleyasining «Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash» va «Ma’rifat va diniy bag‘rikenglik» rezolyutsiyalarini, shuningdek, Yoshlar huquqlari to‘g‘risida BMT konvensiyasini ishlab chiqish va ilgari surish bo‘yicha tashabbusini qo‘llab-quvvatladi.

Tomonlar Tojikistonning 2018 yilda MDHga raislik qilishini hisobga olgan holda, Hamdo‘stlikni o‘zaro manfaatli hamkorlikni rivojlantirish uchun ta’sirchan maydonga aylantirish maqsadida uning mexanizmlaridan yanada samarali foydalanishdan o‘zaro manfaatdor ekanliklarini bildirdilar.

O‘zbekiston tomoni Tojikiston tomonining Dushanbe shahrida Shanxay hamkorlik tashkiloti Antinarkotik markazini tashkil qilish to‘g‘risidagi tashabbusini qo‘llab-quvvatladi.

Tojikiston tomoniga Shanxay hamkorlik tashkiloti mamlakatlari temir yo‘l ma’muriyatlari rahbarlarining muntazam uchrashuvlarini o‘tkazish hamda ShHT a’zo-davlatlari rahbarlarining yoshlarga qo‘shma murojaatini qabul qilish to‘g‘risidagi O‘zbekiston tomoni tashabbusini qo‘llab-quvvatlaganlik uchun minnatdorlik bildirildi.

Prezidentlar Islom hamkorlik tashkiloti doirasida ikki mamlakatning konstruktiv hamkorligiga yuqori baho berdilar. Tojikiston tomoni Tashkilotning Fan va texnologiyalar bo‘yicha ikkinchi sammitini 2020 yilda O‘zbekistonda o‘tkazish to‘g‘risida O‘zbekiston tomonining taklifini qo‘llab-quvvatladi.

17. Davlat rahbarlari Tomonlar o‘rtasida imzolangan ikki tomonlama hujjatlarni o‘z vaqtida va vijdonan bajarishga sodiq ekanliklarini bildirdilar hamda o‘zaro qiziqish uyg‘otadigan sohalarda O‘zbekiston-Tojikiston munosabatlarini jadallashtirish uchun shartnomaviy-huquqiy bazani yanada takomillashtirish va kengaytirish maqsadga muvofiq ekanligini ta’kidladilar.

Tomonlar O‘zbekiston Respublikasi Prezidenti Shavkat Mirziyoyevning davlat tashrifi natijalarini mamnuniyat bilan e’tirof etdilar hamda bo‘lib o‘tgan muzokaralar va tashrif davomida imzolangan hujjatlar turli sohalarda ikki tomonlama o‘zaro manfaatli hamkorlikni yanada rivojlantirishga yangi turtki berishini, shuningdek, davlatlararo munosabatlarni har tomonlama chuqurlashtirishga salmoqli hissa qo‘shishini ta’kidladilar.

18. O‘zbekiston Respublikasi Prezidenti Shavkat Mirziyoyev Tojikiston Respublikasi Prezidenti Imomali Rahmonga va butun Tojikiston xalqiga O‘zbekiston delegatsiyasiga ko‘rsatilgan mehmondo‘stlik, samimiy va do‘stona qabul uchun minnatdorlik bildirdi hamda Tojikiston Respublikasi Prezidenti Imomali Rahmonga davlat tashrifi bilan O‘zbekistonda bo‘lishni taklif qildi. Tashrifning aniq muddatlari diplomatik kanallar orqali kelishiladi.

Мирзиёев ва Раҳмоннинг қўшма баёноти қабул қилинди, унда Роғун ГЭС ҳам тилга олинган
Фото: Президент матбуот хизмати

Тожикистон Республикаси Президенти Имомали Раҳмоннинг таклифига биноан Ўзбекистон Республикаси Президенти Шавкат Мирзиёев 2018 йил 9-10 март кунлари давлат ташрифи билан Тожикистон Республикасида бўлди.

Очиқ, дўстона ва конструктив муҳитда ўтган самарали музокаралар давомида давлат раҳбарлари Ўзбекистон Республикаси билан Тожикистон Республикаси ўртасидаги муносабатларнинг ҳозирги ҳолатидаги муҳим масалаларни, сиёсий, савдо-иқтисодий, транспорт-коммуникациявий, маданий-гуманитар ва бошқа соҳаларда икки томонлама кенг қамровли ҳамкорликни янада кенгайтириш ва чуқурлаштириш истиқболларини, шунингдек, ўзаро қизиқиш уйғотадиган долзарб минтақавий ва халқаро муаммоларни батафсил муҳокама қилдилар.

Ўзбекистон ТИВ ахборот хизмати томонидан Ўзбекистон Президенти Шавкат Мирзиёев ва Тожикистон Президенти Имомали Раҳмоннинг дўстлик ва аҳил қўшничиликни мустаҳкамлаш тўғрисидаги қўшма баёноти матни эълон қилинди.

Давлат раҳбарлари сўнгги йилларда эришилган давлатлараро мулоқотнинг юқори даражасини, шунингдек, икки мамлакат ўртасидаги ҳамкорликни ривожлантиришда кузатилаётган ижобий ўсиш суръатини мамнуният билан қайд этган ҳолда,

икки мамлакат халқлари ўртасида дўстлик, аҳил қўшнилик ва ўзаро ҳурмат тамойилларига қатъий асосланган кўп асрлик тарихий ва маданий умумийликдан келиб чиқиб,

Ўзбекистон билан Тожикистон ўртасидаги конструктив ва ўзаро манфаатли ҳамкорлик икки мамлакат халқларининг узоқ муддатли манфаатларига жавоб беришига, шунингдек, бутун Марказий Осиё минтақасида тинчлик, барқарорлик, хавфсизлик ва изчил ривожланишни таъминлашда асосий омил бўлишига ишонч билдирган ҳолда,

халқаро ҳуқуқнинг умумэътироф этилган принциплари ва нормаларига, шунингдек, БМТ Низоми мақсад ва принципларига, шу жумладан, мустақилликни ўзаро ҳурмат қилиш, суверенитет, ҳудудий яхлитлик, чегараларнинг дахлсизлиги, бир-бирларининг ички ишларига аралашмаслик, тенг ҳуқуқлилик ва ўзаро манфаатдорлик принципларига содиқликларини яна бир бор тасдиқлаб,

Ўзбекистон-Тожикистон муносабатларини янада кенгайтириш ва чуқурлаштиришга, эришилган келишувларни ўз вақтида ва тўлиқ амалга оширилишини таъминлашга интилган ҳолда, қуйидагилар тўғрисида баёнот берадилар:

1. Давлат раҳбарлари тинчлик ва барқарорликни сақлаш ва мустаҳкамлаш, бутун минтақа тараққиёти ва равнақини таъминлашда юксак масъулиятларини чуқур англаб, 2000 йил 15 июнда имзоланган Ўзбекистон Республикаси билан Тожикистон Республикаси ўртасида абадий дўстлик тўғрисида Шартнома қоидаларига таянган ҳолда, анъанавий дўстлик, аҳил қўшнилик ва ҳамкорлик муносабатларини имкон қадар янада ривожлантириш ва чуқурлаштиришга қатъий тайёр эканликларини тасдиқлайдилар.

Давлат раҳбарлари ташриф давомида имзоланган Ўзбекистон Республикаси билан Тожикистон Республикаси ўртасида ўзбек-тожик Давлат чегарасининг алоҳида участкалари тўғрисида Шартнома бунга хизмат қилишига ишонч билдирдилар.

Давлат раҳбарлари Ўзбекистон Республикаси билан Тожикистон Республикаси ўртасидаги Давлат чегарасини дўстлик, аҳил қўшнилик ва ҳамкорлик чегарасига айлантиришнинг муҳимлигини ҳамда бу икки қардош халқларнинг ҳаётий муҳим манфаатларига жавоб беришини таъкидладилар.

2. Томонлар икки давлат ўртасидаги муносабатларни изчил кенгайтириш учун конструктив сиёсий мулоқотнинг муҳимлигини қайд этган ҳолда, олий, юқори ва бошқа даражаларда алоқаларни янада кенгайтириш тарафдори эканликларини таъкидладилар.

Президентлар узоқ муддатли ҳамкорликнинг ҳуқуқий асосларини янада ривожлантириш ва ҳамкорликнинг барча йўналишларидаги мавжуд юксак салоҳиятни имкон қадар тўла рўёбга чиқариш мақсадида яқин истиқболда икки давлат ўртасида Стратегик шериклик тўғрисидаги шартномани ишлаб чиқишга келишиб олдилар.

3. Тожикистон Республикаси Президенти Имомали Раҳмон Ўзбекистон Республикаси Президенти Шавкат Мирзиёев томонидан Ўзбекистонда амалга оширилаётган, мамлакат салоҳиятини мустаҳкамлаш, миллий иқтисодиётни ривожлантириш, халқ фаровонлигини ошириш ва мамлакатнинг халқаро нуфузини мустаҳкамлашга қаратилган кенг кўламли ўзгаришларни қўллаб-қувватлашини билдирди.

Тожикистон Республикаси раҳбарияти минтақавий ҳамкорликни фаоллаштириш, хусусан, Марказий Осиё давлатлари раҳбарларининг маслаҳатлашувлари бўйича учрашувларни мунтазам ташкил қилиш юзасидан Ўзбекистон Республикаси ташаббусларини қўллаб-қувватлашини билдирди.

4. Ўзбекистон Республикаси Президенти Шавкат Мирзиёев Тожикистон Республикаси Президенти Имомали Раҳмоннинг Тожикистон ижтимоий-иқтисодий ривожланишини таъминлаш ва минтақавий хавфсизликни мустаҳкамлаш бўйича саъй-ҳаракатларини қўллаб-қувватлашини билдирди.

Ўзбекистон раҳбарияти Тожикистоннинг 2018-2028 йилларда «Сув барқарор ривожланиш учун» халқаро ҳаракатлар ўн йиллиги тўғрисидаги ташаббусини қўллаб-қувватлашини билдирди.

5. Президентлар Ўзбекистон Республикаси билан Тожикистон Республикаси ўртасида ўзаро манфаатли савдо-иқтисодий ҳамкорликни янада кенгайтиришнинг стратегик хусусиятини қайд этдилар.

Томонлар ўзаро савдода кузатилаётган ижобий ўсиш суръатини мамнуният билан қайд этдилар ҳамда икки томонлама товар айланмаси номенклатурасини диверсификация қилиш ва яқин йилларда унинг ҳажмини 500 млн. долларга етказиш учун улкан салоҳият мавжудлигини таъкидладилар.

Шу муносабат билан Томонлар ўзаро савдо номенклатурасини янада кенгайтириш муҳимлигини тасдиқладилар. Томонлар саноат кооперацияларини ривожлантириш, қўшма корхоналар ва савдо уйларини яратиш, ташқи савдо инфратузилмалари ва экспорт-импорт операцияларини қўллаб-қувватлаш механизмларини фаол ривожлантириш, шунингдек, ўзаролик асосида бизнес-форумлар ва саноат маҳсулотларининг миллий кўргазмаларини ташкил қилиш учун улкан салоҳият мавжудлигини қайд этдилар.

Томонлар иккала мамлакат иқтисодиётига инвестицияларни жалб қилиш ва рағбатлантириш бўйича биргаликдаги саъй-ҳаракатларини амалга оширадилар. Шу муносабат билан давлат раҳбарлари Ўзбекистон Республикаси Ҳукумати билан Тожикистон Республикаси Ҳукумати ўртасида инвестицияларни рағбатлантириш ва ўзаро ҳимоя қилиш тўғрисида Битим имзоланганини мамнуният билан қайд этадилар.

Томонлар ишбилармон доиралар ўртасида алоқаларни кенгайтириш ҳамда салмоқли савдо битимлари ва шартномаларни тузишга кўмаклашган ўзаро миллий кўргазмалар ва бизнес-форумлар 2017-йилда Тошкент ва Душанбе шаҳарларида муваффақиятли ўтказилганлигини қайд этдилар.

Бўлиб ўтган олий даражадаги ташриф доирасида Душанбе шаҳрида ташкил қилинган «Ўзбекистонда ишлаб чиқарилган» кўргазмаси ва Ўзбекистон-Тожикистон қўшма бизнес-форумига юқори баҳо берилди.

Икки давлат раҳбарлари 2018-йил 10-январьда Душанбе шаҳрида бўлиб ўтган Савдо-иқтисодий ҳамкорлик бўйича ҳукуматлараро комиссиянинг бешинчи йиғилиши якунларини ижобий баҳоладилар ҳамда савдо-иқтисодий ва маданий-гуманитар ҳамкорликни ривожлантириш бўйича барча масалаларни ҳал қилишда, шунингдек, ҳамкорликнинг янги истиқболли йўналишларини аниқлашда унинг самарали механизм сифатидаги рольини янада кучайтириш зарурлигини таъкидладилар.

Томонлар мазкур ташриф давомида имзоланган Ўзбекистон Республикаси Ҳукумати билан Тожикистон Республикаси Ҳукумати ўртасида минтақалараро ҳамкорлик тўғрисида Битимга мувофиқ савдо-иқтисодий, илмий-техникавий ва маданий-гуманитар соҳаларда икки давлат минтақалари ўртасидаги алоқаларни кенгайтириш ва чуқурлаштириш зарурлигини қайд этдилар.

6. Давлат раҳбарлари икки мамлакатнинг умумий транспорт-коммуникациявий имкониятлари ва транзит салоҳиятидан имкон қадар тўла фойдаланишга алоҳида аҳамият берган ҳолда, транспорт қатнови соҳасидаги ҳамкорликни жадаллаштириш ва мавжуд автомобиль, темир йўл, ҳаво қатнови транзит йўналишларини қайта тиклаш ва янгиларини яратиш масалаларини ишлаб чиқиш юзасидан тегишли идораларга топшириқ бердилар.

Президентлар томонидан 2017 йилнинг апрель ойида Тошкент шаҳри билан Душанбе шаҳри ўртасида тўғридан-тўғри авиақатновнинг очилиши катта мамнуният билан қайд этилди.

Томонлар икки мамлакат шаҳарлари ўртасида мавжуд автомобиль, темир йўл ва ҳаво қатнови йўналишларини қайта ишга тушириш ва янгиларини очиш Ўзбекистон билан Тожикистон ўртасида маданий-гуманитар ва савдо-иқтисодий муносабатларнинг фаоллашувига кўмаклашишини таъкидладилар.

Ўзбекистон Республикаси ва Тожикистон Республикаси темир йўллари иштирокида ташқи савдо юкларини ташишда рақобатбардош тарифларни шакллантириш масалалари бўйича янада кенг ҳамкорлик қилиш амалдаги транспорт йўлакларини самарали иш юкламаси билан таъминлашга имкон яратиши қайд этилди.

Шу муносабат билан икки давлат раҳбарлари «Ғалаба – Амузанг» участкасида темир йўл қатновининг қайта ишга туширилганини мамнуният билан таъкидладилар.

7. Иккала давлат раҳбарлари маданий-гуманитар соҳада, илмий муассасалар, ўқув юртлари, оммавий ахборот воситалари, ижодий ва спорт жамоалари, ёшлар ва хотин-қизлар ташкилотлари, касаба уюшмалари ва бошқа фуқаролик жамияти институтлари ўртасида тўғридан-тўғри алоқалар ва тажриба алмашинувни ривожлантириш бўйича ҳамкорликнинг устувор хусусиятини қайд этдилар.

Давлат раҳбарлари томонидан 2017 йилда Тожикистон Республикасида Ўзбекистон Республикаси маданияти кунлари ва Ўзбекистон Республикасида Тожикистон Республикаси маданияти кунлари муваффақиятли ўтказилганига юқори баҳо берилди.

Давлат раҳбарлари таълим ва фан соҳасида ўзаро алоқаларни, шу жумладан, икки мамлакат олий ўқув юртлари ва фанлар академиялари ўртасида ҳамкорликни ривожлантириш орқали кенгайтириш зарурлигини қайд этдилар.

Томонлар илмий ва педагогик кадрларни тайёрлаш, тадқиқотчилар, мутахассислар, профессор-ўқитувчи кадрлар ва талабалар билан алмашинув, шунингдек, таълим тўғрисидаги ҳужжатлар, малака ва илмий даражаларни ўзаро тан олиш масалалари бўйича ахборот алмашинуви соҳаларида ҳамкорлик қиладилар ва қулай шароитлар яратадилар.

8. Томонлар бундан буён ҳам икки давлат ҳудудида миллий маданий марказлар фаолияти учун она тили, маданияти, анъана ва урф-одатларини сақлаш ҳамда ривожлантиришда қулай шароитлар яратиб берадилар, бир давлат ҳудудидаги бошқа давлат фуқароларининг ҳуқуқ ва манфаатларини таъминлаш бўйича чора-тадбирларни амалга оширадилар.

Икки мамлакат Президентлари ўзбек тилини Тожикистонда ҳамда тожик тилини Ўзбекистонда ўрганиш ва ўргатишни такомиллаштириш, ўзбек ва тожик тилларида ўқитиладиган умумий таълим ўқув муассасалари тизимини кенгайтириш, ўқув ва бадиий адабиётлар, даврий ва илмий нашрлар билан алмашинув бўйича ҳамкорлик ўрнатиш, икки мамлакатнинг мумтоз адабиёт вакиллари ва замонавий муаллифлари асарларини таржима қилишни қўллаб-қувватлаш масалаларига алоҳида эътибор қаратадилар.

Тожикистон томони Самарқанд шаҳрида икки халқнинг буюк вакиллари А.Навоий ва А.Жомийга ёдгорлик ўрнатилишини, шунингдек, Самарқанд шаҳридаги замонавий тожик адабиётининг асосчиси С.Айний музейининг реконструкция қилинишини мамнуният билан қарши олди.

Ўзбекистон томони, ўз навбатида, Тожикистон Республикаси Ҳукуматининг Душанбе шаҳрида А.Навоий номидаги паркни барпо қилиш ва унда А.Навоий ва А.Жомийга ёдгорлик ўрнатиш ҳақидаги қарорини мамнуният билан қарши олди.

9. Томонлар Ўзбекистон-Тожикистон Давлат чегарасидан ўтказиш пунктлари фаолиятининг қайта тикланганини мамнуният билан эътироф этиб, уларнинг тўлақонли фаолият юритиши иккала халқ манфаатларига хизмат қилишини ҳамда икки томонлама муносабатларни янада ривожлантириш учун қулай шароитлар яратишини таъкидладилар.

Давлат раҳбарлари Ўзбекистон ва Тожикистон халқлари ўртасидаги алоқаларни мустаҳкамлашга кўмаклашадиган, икки давлат фуқароларининг 30 кунга қадар ўзаро сафарлари учун визасиз режимнинг жорий қилинаётганини мамнуният билан қайд этдилар.

10. Президентлар терроризм ва экстремизм, наркотрафик, трансмиллий уюшган жиноятчилик, ноқонуний қурол савдоси, оммавий қирғин қуролларини тарқатиш, ноқонуний миграция ҳамда бошқа минтақавий ва халқаро хавфсизликка оид хуруж ва таҳдидларга қарши курашишда ҳам икки томонлама, ҳам халқаро форматларда ҳамкорликни мустаҳкамлашга, шунингдек, ўз ҳудудларида Томонларнинг миллий хавфсизлик манфаатларига қарши қаратилган ноқонуний фаолиятни амалга оширишга йўл қўймасликка тайёр эканликларини тасдиқладилар.

Ушбу мақсадларда Ўзбекистон ва Тожикистон тегишли идораларининг маслаҳатлашувларини ўтказиш орқали ҳамкорликни такомиллаштириш бўйича барча зарурий чоралар кўрилади.

11. Икки давлат раҳбарлари ҳарбий ва ҳарбий-техникавий соҳаларда, шунингдек, ҳарбий таълим соҳасида ўзаро манфаатли асосларда ҳамкорликни ривожлантиришга тайёр эканликларини тасдиқладилар.

12. Президентлар икки мамлакатнинг чегараолди ҳудудларида муҳандислик тўсиқлари участкаларини зарарсизлантириш масаласи бўйича Ўзбекистон-Тожикистон қўшма ишчи гуруҳи тузилишини мамнуният билан эътироф этдилар ва мазкур ишларни 2018-2019 йилларда якунлаш лозимлигини қайд этдилар.

13. Президентлар фавқулодда вазиятларнинг олдини олиш ва уларни бартараф қилиш соҳасидаги алоқаларни чуқурлаштириш, амалий ҳамкорликни кенгайтириш ва аниқ тадбирларни амалга ошириш муҳимлигини таъкидладилар.

14. Томонлар Марказий Осиёда тинчлик, барқарорлик, хавфсизлик ва изчил ривожланишни таъминлашга доир долзарб масалалар бўйича позицияларининг бир-бирига мос келиши ёки яқинлигини тасдиқладилар.

Давлат раҳбарлари Марказий Осиёда барча ички минтақавий муаммоларни ҳал этиш минтақа давлатларининг фақатгина ўзлари томонидан очиқ ва конструктив мулоқот орқали тенг ҳуқуқлилик, ўзаро манфаатдорлик ва бир-бирларининг манфаатларини ҳурмат қилиш ва ҳисобга олиш принциплари асосида амалга оширилиши мумкин ва лозимлигини таъкидладилар.

15. Президентлар Марказий Осиё фаровонлигининг асосий омилларидан бири минтақанинг барча давлатлари манфаатларини ҳисобга олган ҳолда сув-энергетика ресурсларидан комплекс фойдаланиш эканлигини таъкидладилар. Очиқ мулоқот, ўзаро англашувни мустаҳкамлаш ва конструктив ҳамкорликни ривожлантириш, ўзаро мақбул, адолатли ва оқилона ечимларни топиш муҳимлиги қайд этилди.

Томонлар сув ресурсларидан оқилона ва адолатли фойдаланиш соҳасида минтақавий шерикликни ривожлантиришдан ўзаро манфаатдор эканликларини билдирдилар ҳамда Марказий Осиё учун сув-энергетика муаммоларини ҳал этишда мавжуд ва барпо этилаётган гидроэнергетик иншоотлар муҳим аҳамиятга эга эканлигини таъкидладилар.

Шу муносабат билан Ўзбекистон томони Тожикистон Республикасида гидротехник иншоотлар, шу жумладан, Роғун гидроэлектр станциясининг қурилишида умумътироф этилган халқаро нормалар ва мазкур объектларни қуриш бўйича стандартларга риоя қилинишини ҳисобга олган ҳолда иштирок этиш имкониятини ҳар томонлама кўриб чиқишга тайёр эканлигини билдирди.

Давлат раҳбарлари минтақадаги барча давлатларнинг манфаатларини ҳисобга олган ҳолда конструктив мулоқот ўрнатишга кўмаклашадиган Марказий Осиё трансчегаравий сув ресурсларидан комплекс тарзда ва самарали фойдаланиш бўйича ҳуқуқий механизмларни такомиллаштириш зарурлигини таъкидладилар.

Томонлар Марказий Осиё халқаро экологик форуми (Тошкент, 2018 йил 5-8 июнь) ва 2018-2028 йилларда «Сув барқарор ривожланиш учун» халқаро ҳаракатлар ўн йиллиги бўйича олий даражадаги халқаро конференция (Душанбе, 2018 йил 20-22 июнь) ўтказилишини мамнуният билан эътироф этадилар.

16. Президентлар халқаро масалаларда ҳар қандай қарама-қаршилик ва келишмовчиликларни фақатгина сиёсий йўл билан, музокаралар ва бошқа тинч воситалар орқали ҳал қилиш мумкин, деган якдил фикрдалар.

Томонлар халқаро майдонда икки томонлама ҳамкорликни давом эттириш ва мустаҳкамлаш учун салмоқли салоҳият мавжудлигини қайд этдилар ҳамда Бирлашган Миллатлар Ташкилоти, Мустақил Давлатлар Ҳамдўстлиги, Шанхай ҳамкорлик ташкилоти, Ислом ҳамкорлик ташкилоти ва бошқа халқаро ташкилотлар доирасида Ўзбекистон ва Тожикистон ҳамкорлигини янада ривожлантиришга ўзаро интилишларини билдирдилар.

Президентлар БМТ глобал хавфсизликни сақлашга кўмаклашадиган етакчи универсал халқаро тузилма, шунингдек, давлатлараро ва халқаро муаммоларни ҳал қилиш учун асосий майдон бўлиб қолмоқда, деган якдил фикрдалар. Томонлар халқаро муносабатларда унинг марказий мувофиқлаштирувчи ролини мустаҳкамлаш тарафдори эканликларини тасдиқладилар.

Томонлар «Тинчлик жараёни, хавфсизлик соҳасида ҳамкорлик ва минтақавий шериклик» номли Афғонистон бўйича олий даражадаги халқаро конференция (Тошкент шаҳри, 2018 йил 26-27 март) ҳамда Терроризм ва радикализмга қарши курашиш масалалари бўйича олий даражадаги халқаро конференция (Душанбе шаҳри, 2018 йил 3-4 май) ўтказилишини мамнуният билан эътироф этадилар.

Тожикистон томони Ўзбекистон томонининг БМТ Бош Ассамблеясининг «Марказий Осиё минтақасида тинчлик, барқарорлик ва изчил тараққиётни таъминлаш бўйича минтақавий ва халқаро ҳамкорликни мустаҳкамлаш» ва «Маърифат ва диний бағрикенглик» резолюцияларини, шунингдек, Ёшлар ҳуқуқлари тўғрисида БМТ конвенциясини ишлаб чиқиш ва илгари суриш бўйича ташаббусини қўллаб-қувватлади.

Томонлар Тожикистоннинг 2018 йилда МДҲга раислик қилишини ҳисобга олган ҳолда, Ҳамдўстликни ўзаро манфаатли ҳамкорликни ривожлантириш учун таъсирчан майдонга айлантириш мақсадида унинг механизмларидан янада самарали фойдаланишдан ўзаро манфаатдор эканликларини билдирдилар.

Ўзбекистон томони Тожикистон томонининг Душанбе шаҳрида Шанхай ҳамкорлик ташкилоти Антинаркотик марказини ташкил қилиш тўғрисидаги ташаббусини қўллаб-қувватлади.

Тожикистон томонига Шанхай ҳамкорлик ташкилоти мамлакатлари темир йўл маъмуриятлари раҳбарларининг мунтазам учрашувларини ўтказиш ҳамда ШҲТ аъзо-давлатлари раҳбарларининг ёшларга қўшма мурожаатини қабул қилиш тўғрисидаги Ўзбекистон томони ташаббусини қўллаб-қувватлаганлик учун миннатдорлик билдирилди.

Президентлар Ислом ҳамкорлик ташкилоти доирасида икки мамлакатнинг конструктив ҳамкорлигига юқори баҳо бердилар. Тожикистон томони Ташкилотнинг Фан ва технологиялар бўйича иккинчи саммитини 2020 йилда Ўзбекистонда ўтказиш тўғрисида Ўзбекистон томонининг таклифини қўллаб-қувватлади.

17. Давлат раҳбарлари Томонлар ўртасида имзоланган икки томонлама ҳужжатларни ўз вақтида ва виждонан бажаришга содиқ эканликларини билдирдилар ҳамда ўзаро қизиқиш уйғотадиган соҳаларда Ўзбекистон-Тожикистон муносабатларини жадаллаштириш учун шартномавий-ҳуқуқий базани янада такомиллаштириш ва кенгайтириш мақсадга мувофиқ эканлигини таъкидладилар.

Томонлар Ўзбекистон Республикаси Президенти Шавкат Мирзиёевнинг давлат ташрифи натижаларини мамнуният билан эътироф этдилар ҳамда бўлиб ўтган музокаралар ва ташриф давомида имзоланган ҳужжатлар турли соҳаларда икки томонлама ўзаро манфаатли ҳамкорликни янада ривожлантиришга янги туртки беришини, шунингдек, давлатлараро муносабатларни ҳар томонлама чуқурлаштиришга салмоқли ҳисса қўшишини таъкидладилар.

18. Ўзбекистон Республикаси Президенти Шавкат Мирзиёев Тожикистон Республикаси Президенти Имомали Раҳмонга ва бутун Тожикистон халқига Ўзбекистон делегациясига кўрсатилган меҳмондўстлик, самимий ва дўстона қабул учун миннатдорлик билдирди ҳамда Тожикистон Республикаси Президенти Имомали Раҳмонга давлат ташрифи билан Ўзбекистонда бўлишни таклиф қилди. Ташрифнинг аниқ муддатлари дипломатик каналлар орқали келишилади.

kun.uz

Leave a Comment