04.07.2015
So‘nggi haftalarda O‘zbekistonning qo‘shni davlatlar bilan chegarasida turfa noxush hodisalar ro‘y berayotganiga doir xabarlar tarqalmoqda.
Tojikiston shimolidagi So‘g‘d viloyatining Farg‘ona viloyati bilan chegarada o‘zbekistonlik chegarachilarning mol boqayotgan qo‘shni davlat fuqarolariga qarata o‘t ochgani, oqibatda bir nafar tojikistonlikning yaralanganiga doir xabarga rasmiy Toshkent munosabat bildirgan.
Podrobno. Uz nashriga ko‘ra, Davlat chegarasini qo‘riqlash qo‘mitasi matbuot xizmati bu xabarni rad etgan.
Milliy Xavfsizlik xizmatining ta’kidlashicha, 25 iyun kuni ikki tojikistonlik Beshariq tumanida chegara hududini noqonuniy kesib o‘tgan.
Tojikistonliklar qo‘lga olish jarayonida chegarachilarga qarshilik ko‘rsatgani aytiladi.
O‘zbekiston Milliy Xavfsizlik Xizmatiga ko‘ra, shundan keyin avval havoga, keyin esa ularga qarata o‘q uzilgan.
Buning oqibatida So‘g‘d viloyati, Konibodom tumanida istiqomat qiluvchi 30 yoshli Tojikiston fuqarosi T.Usmonov yaralangan va Beshariqdagi kasalxonaga yotqizilgan.
Uning hamrohi 24 yoshli X.Qobilov qo‘lga olingan.
Ayni hodisa yuzasidan jinoiy ish qo‘zg‘otilgan.
O‘zbekiston xavfsizlik xizmati bu ikki tojikistonlik qo‘lga olinish jarayonida atrofda hech qanday chorva mollari bo‘lmaganini ham urg‘ulagan.
Baliqchilarga hujum
O‘zbek chegarachilari Sirdaryoda qozoq baliqchisini otib o‘ldirgan
O‘tgan hafta O‘zbekiston chegarachilari qo‘shni qozog‘istonlik baliqchilarni o‘qqa tutgani haqida xabarlar tarqalgandi.
Oqibatda bir nafar qozog‘istonlik halok bo‘lgandi.
Bu borada Qozog‘iston Tashqi ishlar vazirligi Toshkentga norozilik notasini yo‘llagan.
Almati shahrida esa bir guruh faollar O‘zbekiston konsulligi qarshisida piket uyushtirib, prezident Islom Karimovga o‘z norozilik talablarini topshirmoqchi bo‘lishgan.
Qozog‘iston Tashqi ishlar vazirligining norozilik notasida O‘zbekiston chegarachilarining qurol ishlatishi ikki mamlakat orasidagi do‘stona munosabatlarga rahna solishi urg‘ulangan.
Chegara bilmas…zo‘ravonliklarmi?
O‘zbekiston va Qirg‘iziston chegarachilari o‘rtasida qonli ziddiyatlar ro‘y berishi yangilik emas
O‘tgan hafta Qirg‘iziston bilan chegarada ham otishma yuz bergan.
Qirg‘iziston Chegara Xizmati matbuot bo‘limi tarqatgan xabarga ko‘ra, 29 iyun kuni Aydarken chegara xizmati bo‘linmasi “Kara-Shoro” chegara nazorat nuqtasida Qirg‘iziston chegarachilari davlat chegarasi chizig‘ida bo‘lgan O‘zbekiston chegarachilariga tanbeh bergan.
Qirg‘iziston Chegara Xizmati matbuot bo‘limiga ko‘ra, O‘zbek chegarachilari birinchi bo‘lib o‘qotar qurolni ishga solganlar.
Aytilishicha, O‘zbekiston chegara qo‘riqchilari Qirg‘iz harbiylarining davlat chegarasiga daxl qilmaslik va chegara chizig‘idan masofa saqlash borasidagi talabiga javoban o‘q uzishgan.
Otishma ikki davlat o‘rtasidagi chegaraning aniq belgilanmagan hududida kechgan.
Markaziy Osiyo chegaralarining ko‘pgina qismi davlat orasida yakdil bir kelishuv bilan aniq belgilab olinmagan.
Sobiq Sho‘ro, hozirda mustaqil davlatlarning chegarada ro‘y beradigan to‘qnashuvlari asosan ana shu bahsli hududlarda kechadi.
O‘zbekiston Qozog‘istondan tashqari barcha chegaradosh qo‘shnilari bilan viza tizimiga ega. Tojikiston va Qirg‘iziston bilan o‘rtadagi ayrim chegara hududlarini esa minalashtirgan.
Kuzatuvchilarga ko‘ra, mintaqa mamlakatlari o‘rtasidagi chegara osha bordi-keldi kamayib, ular bir-biridan tobora uzoqlashib ketishmoqda.
Сўнгги ҳафталарда Ўзбекистоннинг қўшни давлатлар билан чегарасида турфа нохуш ҳодисалар рўй бераётганига доир хабарлар тарқалмоқда.
Тожикистон шимолидаги Сўғд вилоятининг Фарғона вилояти билан чегарада ўзбекистонлик чегарачиларнинг мол боқаётган қўшни давлат фуқароларига қарата ўт очгани, оқибатда бир нафар тожикистонликнинг яраланганига доир хабарга расмий Тошкент муносабат билдирган.
Подробно. Уз нашрига кўра, Давлат чегарасини қўриқлаш қўмитаси матбуот хизмати бу хабарни рад этган.
Миллий Хавфсизлик хизматининг таъкидлашича, 25 июн куни икки тожикистонлик Бешариқ туманида чегара ҳудудини ноқонуний кесиб ўтган.
Тожикистонликлар қўлга олиш жараёнида чегарачиларга қаршилик кўрсатгани айтилади.
Ўзбекистон Миллий Хавфсизлик Хизматига кўра, шундан кейин аввал ҳавога, кейин эса уларга қарата ўқ узилган.
Бунинг оқибатида Сўғд вилояти, Конибодом туманида истиқомат қилувчи 30 ёшли Тожикистон фуқароси Т.Усмонов яраланган ва Бешариқдаги касалхонага ётқизилган.
Унинг ҳамроҳи 24 ёшли Х.Қобилов қўлга олинган.
Айни ҳодиса юзасидан жиноий иш қўзғотилган.
Ўзбекистон хавфсизлик хизмати бу икки тожикистонлик қўлга олиниш жараёнида атрофда ҳеч қандай чорва моллари бўлмаганини ҳам урғулаган.
Балиқчиларга ҳужум
Ўтган ҳафта Ўзбекистон чегарачилари қўшни қозоғистонлик балиқчиларни ўққа тутгани ҳақида хабарлар тарқалганди.
Оқибатда бир нафар қозоғистонлик ҳалок бўлганди.
Бу борада Қозоғистон Ташқи ишлар вазирлиги Тошкентга норозилик нотасини йўллаган.
Алмати шаҳрида эса бир гуруҳ фаоллар Ўзбекистон консуллиги қаршисида пикет уюштириб, президент Ислом Каримовга ўз норозилик талабларини топширмоқчи бўлишган.
Қозоғистон Ташқи ишлар вазирлигининг норозилик нотасида Ўзбекистон чегарачиларининг қурол ишлатиши икки мамлакат орасидаги дўстона муносабатларга раҳна солиши урғуланган.
Чегара билмас…зўравонликларми?
Ўтган ҳафта Қирғизистон билан чегарада ҳам отишма юз берган.
Қирғизистон Чегара Хизмати матбуот бўлими тарқатган хабарга кўра, 29 июн куни Айдаркен чегара хизмати бўлинмаси “Кара-Шоро” чегара назорат нуқтасида Қирғизистон чегарачилари давлат чегараси чизиғида бўлган Ўзбекистон чегарачиларига танбеҳ берган.
Қирғизистон Чегара Хизмати матбуот бўлимига кўра, Ўзбек чегарачилари биринчи бўлиб ўқотар қуролни ишга солганлар.
Айтилишича, Ўзбекистон чегара қўриқчилари Қирғиз ҳарбийларининг давлат чегарасига дахл қилмаслик ва чегара чизиғидан масофа сақлаш борасидаги талабига жавобан ўқ узишган.
Отишма икки давлат ўртасидаги чегаранинг аниқ белгиланмаган ҳудудида кечган.
Марказий Осиё чегараларининг кўпгина қисми давлат орасида якдил бир келишув билан аниқ белгилаб олинмаган.
Собиқ Шўро, ҳозирда мустақил давлатларнинг чегарада рўй берадиган тўқнашувлари асосан ана шу баҳсли ҳудудларда кечади.
Ўзбекистон Қозоғистондан ташқари барча чегарадош қўшнилари билан виза тизимига эга. Тожикистон ва Қирғизистон билан ўртадаги айрим чегара ҳудудларини эса миналаштирган.
Кузатувчиларга кўра, минтақа мамлакатлари ўртасидаги чегара оша борди-келди камайиб, улар бир-биридан тобора узоқлашиб кетишмоқда.
BBC
