Ўзбекистон: Обидхон қори Назаров яна экстремист сифатида талқин қилинмоқдами? O‘zbekiston: Obidxon qori Nazarov yana ekstremist sifatida talqin qilinmoqdami?

(krıl va lotında)

Тошкентдаги жамоат жойларида таниқли уламо, айни дамда Швецияда истиқомат қилаётган Обидхон қори Назаровнинг қидирувда эканлиги тўғрисида маълумотлар пайдо бўлди. Экранларга чиқарилган маълумотда Обидхон қорининг ҳозир қаерда яшаётганлиги кўрсатилган ва у “Жиҳодчилар” диний экстремизм оқими раҳбари сифатида талқин қилинган.

Обид қори Назаровнинг яқинлари ушбу янгиликдан ажабланганини билдирмоқда. Чунки уларнинг айтишича, сўнгги икки йил ичида таниқли уламонинг Наманган шаҳридаги ота-онаси уйига бир гуруҳ мулозимлар бир неча маротаба ташриф буюрган.

Обидхон Назаровнинг ватанига қайтишга кўндиришни илтимос қилишган.

ДХХ, ИИВ, маҳалла ва мусулмонлар идорасидан келган ҳайъат Ўзбекистонда аввалги тазйиқлар тўхтатагани, барча жабҳада ислоҳотлар бошлангани, эски ишларга барҳам берилгани ва янги ҳаётга қадам ташланганини таъкидлашган.

Яқинларининг Би-би-сига айтишича, келган расмийлар Обидхон қори Ўзбекистонга қайтса унга ҳеч қандай хавф йўқлигига ишонтиришга ҳаракат қилишган.
Собитхон Назаровнинг Намангандаги уйига келган расмийлар аввалига ундан фарзандларига Ўзбекистон телевидениеси орқали мурожаат қилишга ундашган.

Шундан сўнг Собитхон Назаровга 20 йилдан бери берилмаётган ОВИР, яъни хорижга чиқиш визаси тўғрилаб берилган. Унга Швецияга бориб, ўғлингизни кўндириб келинг дейишган.

2018 йилнинг октябр ойида Обид қорининг отаси Сотихон Назаров Швеция келди. Қарийб 20 йил деганда ота-бола кўришди.

Назаровнинг Намангандаги уйига келган мутасаддилар Обидхон қори қидирувдан олиб ташлаганини айтишган. Би-би-сига ИИВ вазирлиги сайтидан қидирувга берилган шахслар орасида Обидхон Назаровнинг номи олиб ташлангани 2018 йилнинг июн ойида маълум бўлганди.

Обид қори Назаровнинг яқинлари имом Ўзбекистонга қайтиши учун расмий баёнот сўрашган. Бу ваъдалар нимага асосланиб берилаётгани ҳақида ҳужжат талаб қилишган. Бироқ Собитхон Назаровнинг уйига келган турли идора мутасаддилари Обид қори Ўзбекистонга келса бирор кор ҳол бўлмаслиги ҳақида ҳужжат берамиз, деган ваъдалар билан чекланган.

Ҳозирги кунда юзага келган бу икки хиллик вазиятдан таажжубдамиз, шубҳасиз. Бунинг ортида қандай мақсадлар режа қилингани бизга қоронғу. Аммо биз бу нарсаларнинг албатта очиқланишининг тарафдоримиз.
Довудхон Назаров, Обидхон қорининг ўғли
Имомнинг яқинлари йиллар давомида уйдирма ва ёлғон қурбони бўлиб келаётган инсон бундай ваъдаларга ишониши қийин эканлигини айтмоқда.

Би-би-си ҳолатга аниқлик киритиш учун Ўзбекистон республикаси Бош прокуратурасига бир неча маротаба мурожаат қилди. Бироқ ҳозирча ушбу сўровларимизга жавоб ололганимиз йўқ.

Назаровнинг яқинлари мамлакат ичкарисида содир бўлаётган бир неча ижобий ўзгаришларнинг гувоҳи бўлишаётгани ҳақида ҳам кўплаб хабарлар ва ишоралар келаётганини эътироф этишаркан, таниқли имомнинг сурати яна қидирув экранларида пайдо бўлишини хавотир билан қарши олди.

“Ҳозирги кунда юзага келган бу икки хиллик вазиятдан таажжубдамиз, шубҳасиз. Бунинг ортида қандай мақсадлар режа қилингани бизга қоронғу. Аммо биз бу нарсаларнинг албатта очиқланишининг тарафдоримиз”, дейди имомнинг ўғли Довудхон Назаров.

10 июнь куни Обидхон қори Назаровнинг қайноғаси Абдурауф Насритдинов 10 йил қамоқда ўтирганидан сўнг озодликка чиқди.

Бироқ 2003 йилнинг ёзида милиция томонидан сўроқ қилинганидан кўп ўтмасдан изсиз йўқолган имомнинг ўғли Ҳусниддин Назаровнинг тақдири борасида ҳукумат идоралари сукут сақламоқда.


Обидхон қори Назаров 1996 йилда диний идора сиёсати билан келишмагани учун имомликдан четлатилган. Икки йиллик таъқиблардан сўнг ҳибсга олиниш таҳдиди остида Ўзбекистонни тарк этган.

2006 йилда Швециядан сиёсий бошпана олган.

2012 йилнинг феврал ойида Ўзбекистон ва Россия фуқароси Юрий Жуковский Швецияда яшаётган Обидхон Назаровга бир неча маротаба ўқ узган. Жарроҳлик амалиёти натижасида Назаров тирик қолган.

Жуковский маҳкама қарори билан бир умрлик қамоқ жазосига ҳукм қилинди.

Оғир жароҳат олган таниқлик имом бир қанча вақт комада қолган. Айни дамда унинг соғлиғи тикланиб бораётгани айтилмоқда. У яқинлари билан мулоқотга киришган. Яқинлари тез орада Обидхон Назаров жамоатчиликка кўриниш бериш нияти борлигини маълум қилди.

Toshkentdagi jamoat joylarida taniqli ulamo, ayni damda Shvetsiyada istiqomat qilayotgan Obidxon qori Nazarovning qidiruvda ekanligi to‘g‘risida ma’lumotlar paydo bo‘ldi. Ekranlarga chiqarilgan ma’lumotda Obidxon qorining hozir qayerda yashayotganligi ko‘rsatilgan va u “Jihodchilar” diniy ekstremizm oqimi rahbari sifatida talqin qilingan.

Obid qori Nazarovning yaqinlari ushbu yangilikdan ajablanganini bildirmoqda. Chunki ularning aytishicha, so‘nggi ikki yil ichida taniqli ulamoning Namangan shahridagi ota-onasi uyiga bir guruh mulozimlar bir necha marotaba tashrif buyurgan.
Obidxon Nazarovning vataniga qaytishga ko‘ndirishni iltimos qilishgan.

DXX, IIV, mahalla va musulmonlar idorasidan kelgan hay’at O‘zbekistonda avvalgi tazyiqlar to‘xtatagani, barcha jabhada islohotlar boshlangani, eski ishlarga barham berilgani va yangi hayotga qadam tashlanganini ta’kidlashgan.

Yaqinlarining Bi-bi-siga aytishicha, kelgan rasmiylar Obidxon qori O‘zbekistonga qaytsa unga hech qanday xavf yo‘qligiga ishontirishga harakat qilishgan.
Sobitxon Nazarovning Namangandagi uyiga kelgan rasmiylar avvaliga undan farzandlariga O‘zbekiston televideniyesi orqali murojaat qilishga undashgan.

Shundan so‘ng Sobitxon Nazarovga 20 yildan beri berilmayotgan OVIR, ya’ni xorijga chiqish vizasi to‘g‘rilab berilgan. Unga Shvetsiyaga borib, o‘g‘lingizni ko‘ndirib keling deyishgan.
2018 yilning oktyabr oyida Obid qorining otasi Sotixon Nazarov Shvetsiya keldi. Qariyb 20 yil deganda ota-bola ko‘rishdi.

Nazarovning Namangandagi uyiga kelgan mutasaddilar Obidxon qori qidiruvdan olib tashlaganini aytishgan. Bi-bi-siga IIV vazirligi saytidan qidiruvga berilgan shaxslar orasida Obidxon Nazarovning nomi olib tashlangani 2018 yilning iyun oyida ma’lum bo‘lgandi.

Obid qori Nazarovning yaqinlari imom O‘zbekistonga qaytishi uchun rasmiy bayonot so‘rashgan. Bu va’dalar nimaga asoslanib berilayotgani haqida hujjat talab qilishgan. Biroq Sobitxon Nazarovning uyiga kelgan turli idora mutasaddilari Obid qori O‘zbekistonga kelsa biror kor hol bo‘lmasligi haqida hujjat beramiz, degan va’dalar bilan cheklangan.

Hozirgi kunda yuzaga kelgan bu ikki xillik vaziyatdan taajjubdamiz, shubhasiz. Buning ortida qanday maqsadlar reja qilingani bizga qorong‘u. Ammo biz bu narsalarning albatta ochiqlanishining tarafdorimiz.
Dovudxon Nazarov, Obidxon qorining o‘g‘li
Imomning yaqinlari yillar davomida uydirma va yolg‘on qurboni bo‘lib kelayotgan inson bunday va’dalarga ishonishi qiyin ekanligini aytmoqda.

Bi-bi-si holatga aniqlik kiritish uchun O‘zbekiston respublikasi Bosh prokuraturasiga bir necha marotaba murojaat qildi. Biroq hozircha ushbu so‘rovlarimizga javob ololganimiz yo‘q.

Nazarovning yaqinlari mamlakat ichkarisida sodir bo‘layotgan bir necha ijobiy o‘zgarishlarning guvohi bo‘lishayotgani haqida ham ko‘plab xabarlar va ishoralar kelayotganini e’tirof etisharkan, taniqli imomning surati yana qidiruv ekranlarida paydo bo‘lishini xavotir bilan qarshi oldi.

“Hozirgi kunda yuzaga kelgan bu ikki xillik vaziyatdan taajjubdamiz, shubhasiz. Buning ortida qanday maqsadlar reja qilingani bizga qorong‘u. Ammo biz bu narsalarning albatta ochiqlanishining tarafdorimiz”, deydi imomning o‘g‘li Dovudxon Nazarov.

10 iyun kuni Obidxon qori Nazarovning qaynog‘asi Abdurauf Nasritdinov 10 yil qamoqda o‘tirganidan so‘ng ozodlikka chiqdi.

Biroq 2003 yilning yozida militsiya tomonidan so‘roq qilinganidan ko‘p o‘tmasdan izsiz yo‘qolgan imomning o‘g‘li Husniddin Nazarovning taqdiri borasida hukumat idoralari sukut saqlamoqda.
Obidxon qori Nazarov 1996 yilda diniy idora siyosati bilan kelishmagani uchun imomlikdan chetlatilgan. Ikki yillik ta’qiblardan so‘ng hibsga olinish tahdidi ostida O‘zbekistonni tark etgan.

2006 yilda Shvetsiyadan siyosiy boshpana olgan.

2012 yilning fevral oyida O‘zbekiston va Rossiya fuqarosi Yuriy Jukovskiy Shvetsiyada yashayotgan Obidxon Nazarovga bir necha marotaba o‘q uzgan. Jarrohlik amaliyoti natijasida Nazarov tirik qolgan.

Jukovskiy mahkama qarori bilan bir umrlik qamoq jazosiga hukm qilindi.

Og‘ir jarohat olgan taniqlik imom bir qancha vaqt komada qolgan. Ayni damda uning sog‘lig‘i tiklanib borayotgani aytilmoqda. U yaqinlari bilan muloqotga kirishgan. Yaqinlari tez orada Obidxon Nazarov jamoatchilikka ko‘rinish berish niyati borligini ma’lum qildi.

https://www.bbc.com/uzbek/uzbekistan-48705252

Alakalı yazılar

Yorum yazın