Ҳукумат "ваҳобийлар раҳнамоси" деб атаган Руҳиддин Фахриддинов қамоқдан манзил колониясига ўтказилди.Hukumat "vahobiylar rahnamosi" deb atagan Ruhiddin Faxriddinov qamoqdan manzil koloniyasiga o‘tkazildi

(krıl ve latında)

Тошкент вилояти Чирчиқ шаҳрида жойлашган қаттиқ режимли 13-жазони ижро этиш колониясида жазо ўтаётган Тошкентдаги “Хўжа Нуриддин” масжидининг собиқ имоми Руҳиддин Фахриддинов Тошкент вилояти Зангиота туманидаги 14-сонли манзил колонияга ўтказилди.

52 яшар Руҳиддин Фахриддинов 2006 йил ёзида Ўзбекистон Жиноят Кодексининг 158 (“Ўзбекистон Республикаси Президентига тажовуз қилиш”), 159 (“Ўзбекистон Республикасининг конституциявий тузумига тажовуз қилиш”), 242 (“Жиноий уюшма ташкил этиш”) ва 244 (“Оммавий тартибсизликлар”) каби қатор оғир моддаларида айбланиб, 18 йилга озодликдан маҳрум этилган эди.

Манзил колонияси

Яқинларининг Озодликка айтишича, Руҳиддин Фахриддинов 13 апрель куни Тоштурмага келтирилган ва у ердан 16 апрель куни Зангиота туманидаги манзил колониясига ўтказилган.

Маҳкумнинг турмуш ўртоғи Раҳима Аҳмадалиева 17 апрель куни Озодлик билан суҳбатда яқинлари унинг бутунлай озод этилишини кутгани¸ Фахриддиновнинг манзил колониясига ўтказилганидан ҳафсаласи пир бўлганини билдирди.

– Улар манзил колониясига ўтказилишни умуман қабул қилолганлари йўқ. Аллоҳнинг кадарида бор экан, деб ўзларига таскин бердилар. Бошқа иложи йўқ, – деди Раҳима Аҳмадалиева.

У турмуш ўртоғининг бутунлай озод этилишига яна 4,5 йил қолганини айтаркан, собиқ имомга нисбатан 13,5 йил ичида бирор марта афв қўлланилмаганидан шикоят қилди.

Озодлик суҳбатлашган ҳуқуқ фаоллари Тошкентнинг Шайхонтоҳур туманида жойлашган “Хўжа Нуриддин” масжиди собиқ имомининг ҳозирга қадар озодликка чиқмаганини унга нисбатан қўлланилган жазонинг оғирлиги билан изоҳлашди.

“Ваҳобийлар раҳнамоси”

Ўзбекистон ҳуқуқ-тартибот идораларига кўра, Руҳиддин Фахриддинов 90-йиллар ўрталаридан Ўзбекистонда “исломий давлат қуриш йўлини танлаган турли экстремист оқимлар”, жумладан, ваҳобийлар оқими раҳнамоларидан бирига айланган.

Таниқли имомнинг номи Ўзбекистонда 90-йиллар ўрталаридан кейинги ноқонуний диний ташкилотларга алоқадорлик айбловлари илгари сурилган кўплаб маҳкамада тилга олинган.

Маҳкамаларда Фахриддинов “Ваҳобийлик” оқимининг руҳоний раҳбарларидан бири сифатида тақдим қилинди.

Аммо яқинлари Руҳиддин Фахриддиновнинг эсктремистик оқимларга алоқаси борлиги ҳақидаги айбловларни рад этиб келади.

Совет Иттифоқи давридаги Ўзбекистон ССР Ўрмон хўжалиги вазири Фазлиддин Фахриддиновнинг фарзанди бўлган Руҳиддин Фахриддинов Тошкент Давлат Шарқшунослик Институти араб тили бўлимини тугатган.

Шарқшунослик институтида таълим олиш жараёнида Фахриддинов 1989-90 йилларда собиқ Совет Иттифоқининг талабалар алмашинуви дастури доирасида Қувайтда таълим олган.

1992 йилдан беш йил давомида Тошкентдаги “Хўжа Нуриддин” масжиди имом-хатиби бўлган.

Танишлари ва оила аъзоларига кўра, айнан бу давр ичида Руҳиддин Фахриддинов ҳукумат босимларига учрай бошлаган ва 1997 йилда вазифасидан истеъфо беришга мажбур бўлган.

Истеъфосидан кўп ўтмай Қозоғистонга чиқиб кетган Фахриддинов 1998 йилда Ўзбекистон Ички ишлар вазирлиги томонидан қидирувга берилган.

Ҳибс ва жазо

Қидирувга берилганидан 7 йил ўтиб¸ 2005 йилнинг 24 ноябрида Руҳиддин Фахриддинов, “Тўхтабой” масжидининг собиқ муаззини Абдураҳмон Иброҳимов ва масжид иш юритувчиси Абдурауф Холмуродов каби ўзи дохил 9 диндор билан бирга Қозоғистон ва Ўзбекистон ҳуқуқ-тартибот идоралари ходимлари Чимкентда ўтказган қўшма амалиёт чоғида ҳибсга олинган.

Руҳиддин Фахриддинов 2006 йил ёзида Ўзбекистон Жиноят кодексининг қатор, жумладан 158 (“Ўзбекистон Республикаси Президентига тажовуз қилиш”), 159 (“Ўзбекистон Республикасининг конституциявий тузумига тажовуз қилиш”), 242 (“Жиноий уюшма ташкил этиш”) ва 244 (“Оммавий тартибсизликлар”) каби қатор оғир моддаларда айбланиб, 18 йилга озодликдан маҳрум этилган.

Халқаро инсон ҳақлари ташкилотлари Руҳиддин Фахриддиновни эътиқод маҳкумлари рўйхатига киритган.

Toshkent viloyati Chirchiq shahrida joylashgan qattiq rejimli 13-jazoni ijro etish koloniyasida jazo o‘tayotgan Toshkentdagi “Xo‘ja Nuriddin” masjidining sobiq imomi Ruhiddin Faxriddinov Toshkent viloyati Zangiota tumanidagi 14-sonli manzil koloniyaga o‘tkazildi.

52 yashar Ruhiddin Faxriddinov 2006 yil yozida O‘zbekiston Jinoyat Kodeksining 158 (“O‘zbekiston Respublikasi Prezidentiga tajovuz qilish”), 159 (“O‘zbekiston Respublikasining konstitutsiyaviy tuzumiga tajovuz qilish”), 242 (“Jinoiy uyushma tashkil etish”) va 244 (“Ommaviy tartibsizliklar”) kabi qator og‘ir moddalarida ayblanib, 18 yilga ozodlikdan mahrum etilgan edi.

Manzil koloniyasi

Yaqinlarining Ozodlikka aytishicha, Ruhiddin Faxriddinov 13 aprel kuni Toshturmaga keltirilgan va u yerdan 16 aprel kuni Zangiota tumanidagi manzil koloniyasiga o‘tkazilgan.

Mahkumning turmush o‘rtog‘i Rahima Ahmadaliyeva 17 aprel kuni Ozodlik bilan suhbatda yaqinlari uning butunlay ozod etilishini kutgani¸ Faxriddinovning manzil koloniyasiga o‘tkazilganidan hafsalasi pir bo‘lganini bildirdi.

– Ular manzil koloniyasiga o‘tkazilishni umuman qabul qilolganlari yo‘q. Allohning kadarida bor ekan, deb o‘zlariga taskin berdilar. Boshqa iloji yo‘q, – dedi Rahima Ahmadaliyeva.

U turmush o‘rtog‘ining butunlay ozod etilishiga yana 4,5 yil qolganini aytarkan, sobiq imomga nisbatan 13,5 yil ichida biror marta afv qo‘llanilmaganidan shikoyat qildi.

Ozodlik suhbatlashgan huquq faollari Toshkentning Shayxontohur tumanida joylashgan “Xo‘ja Nuriddin” masjidi sobiq imomining hozirga qadar ozodlikka chiqmaganini unga nisbatan qo‘llanilgan jazoning og‘irligi bilan izohlashdi.

“Vahobiylar rahnamosi”

O‘zbekiston huquq-tartibot idoralariga ko‘ra, Ruhiddin Faxriddinov 90-yillar o‘rtalaridan O‘zbekistonda “islomiy davlat qurish yo‘lini tanlagan turli ekstremist oqimlar”, jumladan, vahobiylar oqimi rahnamolaridan biriga aylangan.

Taniqli imomning nomi O‘zbekistonda 90-yillar o‘rtalaridan keyingi noqonuniy diniy tashkilotlarga aloqadorlik ayblovlari ilgari surilgan ko‘plab mahkamada tilga olingan.

Mahkamalarda Faxriddinov “Vahobiylik” oqimining ruhoniy rahbarlaridan biri sifatida taqdim qilindi.

Ammo yaqinlari Ruhiddin Faxriddinovning esktremistik oqimlarga aloqasi borligi haqidagi ayblovlarni rad etib keladi.

Sovet Ittifoqi davridagi O‘zbekiston SSR O‘rmon xo‘jaligi vaziri Fazliddin Faxriddinovning farzandi bo‘lgan Ruhiddin Faxriddinov Toshkent Davlat Sharqshunoslik Instituti arab tili bo‘limini tugatgan.

Sharqshunoslik institutida ta’lim olish jarayonida Faxriddinov 1989-90 yillarda sobiq Sovet Ittifoqining talabalar almashinuvi dasturi doirasida Quvaytda ta’lim olgan.

1992 yildan besh yil davomida Toshkentdagi “Xo‘ja Nuriddin” masjidi imom-xatibi bo‘lgan.

Tanishlari va oila a’zolariga ko‘ra, aynan bu davr ichida Ruhiddin Faxriddinov hukumat bosimlariga uchray boshlagan va 1997 yilda vazifasidan iste’fo berishga majbur bo‘lgan.

Iste’fosidan ko‘p o‘tmay Qozog‘istonga chiqib ketgan Faxriddinov 1998 yilda O‘zbekiston Ichki ishlar vazirligi tomonidan qidiruvga berilgan.

Hibs va jazo

Qidiruvga berilganidan 7 yil o‘tib¸ 2005 yilning 24 noyabrida Ruhiddin Faxriddinov, “To‘xtaboy” masjidining sobiq muazzini Abdurahmon Ibrohimov va masjid ish yurituvchisi Abdurauf Xolmurodov kabi o‘zi doxil 9 dindor bilan birga Qozog‘iston va O‘zbekiston huquq-tartibot idoralari xodimlari Chimkentda o‘tkazgan qo‘shma amaliyot chog‘ida hibsga olingan.

Ruhiddin Faxriddinov 2006 yil yozida O‘zbekiston Jinoyat kodeksining qator, jumladan 158 (“O‘zbekiston Respublikasi Prezidentiga tajovuz qilish”), 159 (“O‘zbekiston Respublikasining konstitutsiyaviy tuzumiga tajovuz qilish”), 242 (“Jinoiy uyushma tashkil etish”) va 244 (“Ommaviy tartibsizliklar”) kabi qator og‘ir moddalarda ayblanib, 18 yilga ozodlikdan mahrum etilgan.

Xalqaro inson haqlari tashkilotlari Ruhiddin Faxriddinovni e’tiqod mahkumlari ro‘yxatiga kiritgan.

https://www.ozodlik.org/a/29886541.html