Ўзбекистон: Суд рўмол ўраш ҳуқуқини рад қилди, Ислом академияси энди рўмолга эмас ниқобга қаршилигини айтмоқда

KRIL VA LATINDA.

Маъмурий ишлар бўйича Тошкент шаҳар суди Ўзбекистон халқаро Ислом академиясига давлат бюджети асосида ўқишга кирган ва рўмол билан ўқишга қўйилмагач ундан ҳайдалган Луиза Мўминжонованинг аризасини рад қилди. Суддан сўнг муносабат билдирган халқаро Ислом академияси рўмолга эмас, ниқобга қарши эканлигини айтмоқда.

25 март куни Вазирлар Маҳкамаси ҳузуридаги Дин ишлари қўмитаси, Ўзбекистон Мусулмонлари идораси, Ўзбекистон Республикаси олий ва Ўрта махсус таълим вазирлиги ҳамда халқаро Ислом академияси устидан судга киритилган аппеляция шикояти қониқтирилмади.

Судья Холмамат Ҳасанов Мўминжонова адвокатларининг барча илтимосларини рад қилди.

“Суднинг кузатувчиларга нисбатан нохолис ёндашгани ва тарафкашлик қилганидан норози бўлдик. Судга ҳатто бошида Луизани ҳам киритишмади. Иккинчи адвокат чиқиб бориб олиб келди. Иккинчидан менинг қизимни ишини ҳам шу судья кўриб чиққан эди. Унинг холислигидан шубҳа қилиб биз икки адвокат судяни рад қилиш тўғрисида ариза киритдик. Бироқ судья аризамизни рад қилиб, ўзи кўриб чиқишини маълум қилди”, дейди Абдувоҳид Яқубов.

Бундан ташқари мустақил экспертиза ўтказиш ёки диний соҳада мутахассис чақиришиш аризалари ҳам судья Холмамат Ҳасанов томонидан рад қилинган.

Судда Луиза Мўминжонова инглиз, рус ва турк тилларини мукаммал билишини, мақсади халқаро Ислом академиясининг зиёрат туризми йўналишида ўқиб, сайёҳларга Ўзбекистоннинг бой тарихи билан таништириш бўлганини айтган.

Маҳкамага халқаро Ислом академияси ётоқхонасининг коменданти чақирилган.

Судда жавобгар сифатида қатнашган Мусулмонлар идораси ва Дин ишлари қўмитасидан келган вакиллар Луиза Мўминжоновага Ислом институтида ёки мадрасада ўқишни таклиф қилган.

Бироқ Мўминжонова у диний билим олишни эмас, балки зиёрат туризмини дунёвий илм масканида, ҳижоби билан ўқишини исташини айтиб, таклифни рад қилди.

“Иккинчидан мен ҳозир бу таклифга кўниб кетсам, ҳижоби сабаб ўқишга қўйилмаётган қолаётган қизларнинг ҳаққига ҳиёнат қилган бўлмайманми. Мен уларнинг ҳам ҳуқуқи учун курашяпман”, деган Луиза Мўминжонова.

“Диндорларни атайин норози қилиш сиёсати олиб бориляпти. Халқнинг Президент билан бирлашиб бир тан, бир жон бўлиб ишлаши йўлида ҳаракат қилишига кимдир тўсқинлик қиляпти. Диндор одамларни ҳар доим норози ушлаб туриш кимларгадир керакка ўхшаяпти, шу томонларини ҳам инобатга олиб қарор қабул қилинг, дедим судяга. “, дейди Абдувоҳид Яқубов.

Суд ушбу аризани рад қилган. Луиза Мўминжонова суд қароридан норози бўлса Олий судга шикоят қилиши мумкин.

Ўзбекистон халқаро Ислом академияси суд тугаганидан сўнг ўзининг веб саҳифасида ушбу мавзуга бағишлаб учта мақола чоп қилди.

Унда Луизани қўллаб қувватлаган ёки ушбу мавзуни ёритганлар “фитначига” чиқарилганини кўриш мумкин.

“Фитначиларнинг тўхташ ниятлари йўқ. Улар Мўминжонова баҳонасида Ўзбекистонда олиб борилаётган одилона ва халқпарвар сиёсатга шубҳа уйғотмоқчилар. Юртдаги юксалишга раҳна солмоқчилар. Жаҳон ҳамжамияти олдида Ўзбекистоннинг нуфузига доғ туширмоқчилар. Луиза Мўминжонова улар ёқмоқчи бўлган гулхан олдида бир учқун холос. Аммо, мана шу оддий ҳақиқатни айрим кимсалар тушунишни истамаяптилар. Бўлдида, етар энди!”, дейилади мурожаатда.

Академия маъмурияти номидан ёзилган яна бир мақолада адвокат Абдувоҳид Яқубов ҳеч қачон даъвосининг қонунийлигини исботлай олмаслигини айтган ва бунинг учун антиқа асос келтирган.

“Чунки, Ўзбекистон халқаро ислом академияси ўз фаолиятини амалдаги давлат қонунларига таянган ҳолда ташкил этади. Қонунан ишлаётган ташкилотни қонун олдида жавобгарликка тортишга уринишнинг ўзи мантиқсизлик-ку”, деб ёзади Ўзбекистон халқаро ислом академияси маъмурияти.

Академия икки мақоласида рўмолга эмас, балки уни “ниқоб” шаклида ўрашга қарши эканлигини айтган.

Ўзбекистон халқаро Ислом академияси мақоласи тасвириФото муаллифлик ҳуқуқиSCREENSHOT
Image captionЎзбекистон халқаро Ислом академияси мақоласи тасвири

“Яланғоч келишни талаб қилдими? Инсоф қилингда ахир! Қачонгача Ўзбекистон душманларининг ноғорасига ўйнайсиз? Академия талаб қилган форма ҳам кийим-ку? Фақат рўмолни ниқоб шаклида эмас, ўзга маданиятларидан экспорт қилинган шаклига зид ва ўзбек халқининг миллий анъаналарига мос тарзда ўраш талаб қилинди холос? Шунга шунчами”, – дея савол беради академия.

Би-би-сига маълум бўлгани шуки, халқаро Ислом академияси 2018 йилнинг август ойи охири ва сентябр ойларида талаба қизларнинг умумуман рўмол ўрашига қаршилик қилган.

Талабалар бошига парик соч тақишга мажбур бўлган.

Рўмолнинг ниқоб шаклидаги ўралиши Ўзбекистонда деярли учрамайди.

O‘zbekiston: Sud ro‘mol o‘rash huquqini rad qildi, Islom akademiyasi endi ro‘molga emas niqobga qarshiligini aytmoqda
Ma’muriy ishlar bo‘yicha Toshkent shahar sudi O‘zbekiston xalqaro Islom akademiyasiga davlat byudjeti asosida o‘qishga kirgan va ro‘mol bilan o‘qishga qo‘yilmagach undan haydalgan Luiza Mo‘minjonovaning arizasini rad qildi. Suddan so‘ng munosabat bildirgan xalqaro Islom akademiyasi ro‘molga emas, niqobga qarshi ekanligini aytmoqda.

25 mart kuni Vazirlar Mahkamasi huzuridagi Din ishlari qo‘mitasi, O‘zbekiston Musulmonlari idorasi, O‘zbekiston Respublikasi oliy va O‘rta maxsus ta’lim vazirligi hamda xalqaro Islom akademiyasi ustidan sudga kiritilgan appelyatsiya shikoyati qoniqtirilmadi.

Sudya Xolmamat Hasanov Mo‘minjonova advokatlarining barcha iltimoslarini rad qildi.

Diniy idora o‘quvchilarning ro‘mol huquqi to‘g‘risidagi murojaatini o‘chirib tashladi
Toshkent sudi talabaning ro‘mol o‘rab kelish huquqini rad qildi
Ro‘molli talaba: O‘zimni jamiyatda ahamiyatsiz parchadek his qildim
“Sudning kuzatuvchilarga nisbatan noxolis yondashgani va tarafkashlik qilganidan norozi bo‘ldik. Sudga hatto boshida Luizani ham kiritishmadi. Ikkinchi advokat chiqib borib olib keldi. Ikkinchidan mening qizimni ishini ham shu sudya ko‘rib chiqqan edi. Uning xolisligidan shubha qilib biz ikki advokat sudyani rad qilish to‘g‘risida ariza kiritdik. Biroq sudya arizamizni rad qilib, o‘zi ko‘rib chiqishini ma’lum qildi”, deydi Abduvohid Yaqubov.

Bundan tashqari mustaqil ekspertiza o‘tkazish yoki diniy sohada mutaxassis chaqirishish arizalari ham sudya Xolmamat Hasanov tomonidan rad qilingan.

Sudda Luiza Mo‘minjonova ingliz, rus va turk tillarini mukammal bilishini, maqsadi xalqaro Islom akademiyasining ziyorat turizmi yo‘nalishida o‘qib, sayyohlarga O‘zbekistonning boy tarixi bilan tanishtirish bo‘lganini aytgan.

Mahkamaga xalqaro Islom akademiyasi yotoqxonasining komendanti chaqirilgan.

Ikkinchidan men hozir bu taklifga ko‘nib ketsam, hijobi sabab o‘qishga qo‘yilmayotgan qolayotgan qizlarning haqqiga hiyonat qilgan bo‘lmaymanmi. Men ularning ham huquqi uchun kurashyapman
Luiza Mo‘minjonova, da’vogar
Sudda javobgar sifatida qatnashgan Musulmonlar idorasi va Din ishlari qo‘mitasidan kelgan vakillar Luiza Mo‘minjonovaga Islom institutida yoki madrasada o‘qishni taklif qilgan.

Biroq Mo‘minjonova u diniy bilim olishni emas, balki ziyorat turizmini dunyoviy ilm maskanida, hijobi bilan o‘qishini istashini aytib, taklifni rad qildi.

“Ikkinchidan men hozir bu taklifga ko‘nib ketsam, hijobi sabab o‘qishga qo‘yilmayotgan qolayotgan qizlarning haqqiga hiyonat qilgan bo‘lmaymanmi. Men ularning ham huquqi uchun kurashyapman”, degan Luiza Mo‘minjonova.

“Dindorlarni atayin norozi qilish siyosati olib borilyapti. Xalqning Prezident bilan birlashib bir tan, bir jon bo‘lib ishlashi yo‘lida harakat qilishiga kimdir to‘sqinlik qilyapti. Dindor odamlarni har doim norozi ushlab turish kimlargadir kerakka o‘xshayapti, shu tomonlarini ham inobatga olib qaror qabul qiling, dedim sudyaga. “, deydi Abduvohid Yaqubov.

Sud ushbu arizani rad qilgan. Luiza Mo‘minjonova sud qaroridan norozi bo‘lsa Oliy sudga shikoyat qilishi mumkin.

O‘zbekiston xalqaro Islom akademiyasi sud tugaganidan so‘ng o‘zining veb sahifasida ushbu mavzuga bag‘ishlab uchta maqola chop qildi.

Unda Luizani qo‘llab quvvatlagan yoki ushbu mavzuni yoritganlar “fitnachiga” chiqarilganini ko‘rish mumkin.

“Fitnachilarning to‘xtash niyatlari yo‘q. Ular Mo‘minjonova bahonasida O‘zbekistonda olib borilayotgan odilona va xalqparvar siyosatga shubha uyg‘otmoqchilar. Yurtdagi yuksalishga rahna solmoqchilar. Jahon hamjamiyati oldida O‘zbekistonning nufuziga dog‘ tushirmoqchilar. Luiza Mo‘minjonova ular yoqmoqchi bo‘lgan gulxan oldida bir uchqun xolos. Ammo, mana shu oddiy haqiqatni ayrim kimsalar tushunishni istamayaptilar. Bo‘ldida, yetar endi!”, deyiladi murojaatda.

Akademiya ma’muriyati nomidan yozilgan yana bir maqolada advokat Abduvohid Yaqubov hech qachon da’vosining qonuniyligini isbotlay olmasligini aytgan va buning uchun antiqa asos keltirgan.

“Chunki, O‘zbekiston xalqaro islom akademiyasi o‘z faoliyatini amaldagi davlat qonunlariga tayangan holda tashkil etadi. Qonunan ishlayotgan tashkilotni qonun oldida javobgarlikka tortishga urinishning o‘zi mantiqsizlik-ku”, deb yozadi O‘zbekiston xalqaro islom akademiyasi ma’muriyati.

Akademiya ikki maqolasida ro‘molga emas, balki uni “niqob” shaklida o‘rashga qarshi ekanligini aytgan.

O‘zbekiston xalqaro Islom akademiyasi maqolasi tasviri
“Yalang‘och kelishni talab qildimi? Insof qilingda axir! Qachongacha O‘zbekiston dushmanlarining nog‘orasiga o‘ynaysiz? Akademiya talab qilgan forma ham kiyim-ku? Faqat ro‘molni niqob shaklida emas, o‘zga madaniyatlaridan eksport qilingan shakliga zid va o‘zbek xalqining milliy an’analariga mos tarzda o‘rash talab qilindi xolos? Shunga shunchami”, – deya savol beradi akademiya.

Bi-bi-siga ma’lum bo‘lgani shuki, xalqaro Islom akademiyasi 2018 yilning avgust oyi oxiri va sentyabr oylarida talaba qizlarning umumuman ro‘mol o‘rashiga qarshilik qilgan.

Talabalar boshiga parik soch taqishga majbur bo‘lgan.

Ro‘molning niqob shaklidagi o‘ralishi O‘zbekistonda deyarli uchramaydi.

https://www.bbc.com/uzbek/uzbekistan-47693234

Alakalı yazılar

Yorum yazın