(krıl va lotında)
11 февраль куни Давлат хавфсизлик хизмати раиси лавозимидан озод қилинган 53 яшар Ихтиёр Абдуллаев жиноят иши фигурантига айлангани тўғрисида Озодликка Ўзбекистон ҳукуматига яқин, бир-биридан мустақил учта манба иддао қилди.
Айни пайтда Ўзбекистон президентининг Интернетдаги расмий саҳифасида Ихтиёр Абдуллаев соғлиги ёмонлашгани, бир йилда бўйин ва умуртқа поғонасида икки марта оғир жарроҳлик амалиётини ўтказгани ортидан лавозимидан озод қилингани билдирилди.
Озодлик суҳбатлашган ва исми эфирда айтилишини истамаган мулозимга кўра¸ “ДХХ раиси сифатида бир йил ишлаган Ихтиёр Абдуллаев айни ташкилотнинг ўнлаб ходимлари устидан жиноят иши очилиб қамоққа олингани ортидан ишдан бўшатилган”.
Мулозимнинг айтишича¸ Ихтиёр Абдуллаев ҳозирча “иқтисодий жиноятларни содир қилганликда” гумонланмоқда.
Озодлик суҳбатлашган бир-биридан мустақил икки нафар мулозимнинг билдиришича¸ Ихтиёр Абдуллаевга нисбатан Ўзбекистон Жиноят Кодексининг 205-моддаси (“Ҳокимият ёки мансаб ваколатини суиистеъмол қилиш”), 210-модда (“Пора олиш”) ва 211-модда (“Пора бериш”) бўйича жорий йилнинг 8 февралида жиноят иши очилган.
Суҳбатдошлар иддаосига кўра¸ бу жиноят иши январь ойида қамоққа олинган ДХХ ходимлари¸ хусусан ДХХ раисининг собиқ биринчи ўринбосари Жаҳонгир Эгамов кўрсатмаларига асосланган.
Суҳбатдошлар иддаосига кўра¸ жиноят иши республика ҳарбий прокуратураси тарафидан очилган.
Ўзбекистон Бош прокуратураси бу борада “ҳеч қандай маълумотга эга эмаслигини” 11 февраль куни маълум қилди.
Жилов тортилди?
Жорий йилнинг 10 январида жиноятчиликнинг олдини олиш борасидаги келгуси вазифаларга бағишланган видеоселектор йиғилишида президент Шавкат Мирзиëев куч ишлатар тизимлар раҳбарларини “арқонни узун ташлаб қўйгани”дан огоҳлантирган, яқин кунларда “жиловни тортишини” айтган эди.
Озодлик билан ëзишган мулозим иддаосига кўра, 10 январдан то 11 февралга қадар Ўзбекистон Давлат Хавфсизлик Хизматининг юзга яқин ходими устидан жиноят иши очилиб, эҳтиëт чораси сифатида қамоқ қўлланган.
Мулозимларнинг расман тасдиқланмаган иддаосига кўра, ДХХ тарафидан Мирзиëев оила аъзоларининг телефон сўзлашмалари тинглангани ва назорат остига олингани боис Ихтиёр Абдуллаев президент учун “исталмаган шахсга” айланган.
Озодлик тасарруфида бу маълумотнинг расмий тасдиғи ëки инкори ҳозирча йўқ.
Озодлик суҳбатлашган амалдорлар иддаосига кўра, президент Мирзиëев ДХХ ичидаги вазиятни ўз назоратига олиш учун жорий йил бошидан илк қадамларни қўйган.
Президент Шавкат Мирзиёев ўз қудаси Ботир Турсуновни 2 февраль куни Давлат Хавфсизлик Хизмати (ДХХ) раисининг биринчи ўринбосари этиб тайинлагани ҳам шу контекстда кўрилади.
Бу ҳақда Озодликка маълум қилган ҳуқуқ-тартибот тизимларидаги бир-биридан мустақил бир нечта манбага кўра, генерал Ботир Турсунов янги вазифага тайинланаркан, декабрь охирида бўшатилган Жаҳонгир Эгамовнинг ўрнини эгаллаган. Собиқ адлия маслаҳатчиси, Жаҳонгир Эгамов ДХХда бор-йўғи ўн бир ой муқаддам – 2018 йил февралида иш бошлаган эди.
Озодлик 46 яшар Жаҳонгир Эгамовга қарши ДХХнинг бир гуруҳ юқори лавозимли ходимлари қаторида “коррупция иши фигуранти” сифатида жиноят иши очилгани ҳақида мақола эълон қилган эди.
Жорий йилнинг 11 февралида интернетдаги Eltuz.com нашри устидан жиноят иши очилиб қамоққа олинган ДХХ мулозимлари ҳақида ëзди. Айни нашр иддаосига кўра¸ “ДХХ собиқ раисининг божаси Э.А., унинг акаси Э. Ҳ, ДХХ тергов бошқармаси бошлиғи А. А. ва ДХХ раисининг яқин дўсти У.А. билан бирга яна юзга яқин тезкор ходимлар” жорий йил январида қамоққа олинган.
Озодликнинг куч ишлатар тизимларида ишлайдиган манбаси ҳам “ўнлаб ДХХ ходимлари устидан жиноят иши очилгани” борасидаги маълумотни 11 февраль куни тасдиқлади.
Унга кўра¸ қамоққа олинган ДХХ ходимлари Ўзбекистон Жиноят Кодексининг 167-моддаси (“Ўзлаштириш ёки растрата йўли билан талон-торож қилиш”), 205-моддаси (“Ҳокимият ёки мансаб ваколатини суиистеъмол қилиш”), 210-модда (“Пора олиш”) ва 211-модда (“Пора бериш”) кўзда тутган жиноятларда гумон қилинмоқда.
Озодликнинг айни масалада юзасидан берган саволларига Ўзбекистон Бош прокуратураси олдинроқ “Бу борада расмий маълумот йўқ”, дея жавоб берган эди.
11 fevral kuni Davlat xavfsizlik xizmati raisi lavozimidan ozod qilingan 53 yashar Ixtiyor Abdullayev jinoyat ishi figurantiga aylangani to‘g‘risida Ozodlikka O‘zbekiston hukumatiga yaqin, bir-biridan mustaqil uchta manba iddao qildi.
Ayni paytda O‘zbekiston prezidentining Internetdagi rasmiy sahifasida Ixtiyor Abdullayev sog‘ligi yomonlashgani, bir yilda bo‘yin va umurtqa pog‘onasida ikki marta og‘ir jarrohlik amaliyotini o‘tkazgani ortidan lavozimidan ozod qilingani bildirildi.
Ozodlik suhbatlashgan va ismi efirda aytilishini istamagan mulozimga ko‘ra¸ “DXX raisi sifatida bir yil ishlagan Ixtiyor Abdullayev ayni tashkilotning o‘nlab xodimlari ustidan jinoyat ishi ochilib qamoqqa olingani ortidan ishdan bo‘shatilgan”.
Mulozimning aytishicha¸ Ixtiyor Abdullayev hozircha “iqtisodiy jinoyatlarni sodir qilganlikda” gumonlanmoqda.
Ozodlik suhbatlashgan bir-biridan mustaqil ikki nafar mulozimning bildirishicha¸ Ixtiyor Abdullayevga nisbatan O‘zbekiston Jinoyat Kodeksining 205-moddasi (“Hokimiyat yoki mansab vakolatini suiiste’mol qilish”), 210-modda (“Pora olish”) va 211-modda (“Pora berish”) bo‘yicha joriy yilning 8 fevralida jinoyat ishi ochilgan.
Suhbatdoshlar iddaosiga ko‘ra¸ bu jinoyat ishi yanvar oyida qamoqqa olingan DXX xodimlari¸ xususan DXX raisining sobiq birinchi o‘rinbosari Jahongir Egamov ko‘rsatmalariga asoslangan.
Suhbatdoshlar iddaosiga ko‘ra¸ jinoyat ishi respublika harbiy prokuraturasi tarafidan ochilgan.
O‘zbekiston Bosh prokuraturasi bu borada “hech qanday ma’lumotga ega emasligini” 11 fevral kuni ma’lum qildi.
Jilov tortildi?
Joriy yilning 10 yanvarida jinoyatchilikning oldini olish borasidagi kelgusi vazifalarga bag‘ishlangan videoselektor yig‘ilishida prezident Shavkat Mirziëev kuch ishlatar tizimlar rahbarlarini “arqonni uzun tashlab qo‘ygani”dan ogohlantirgan, yaqin kunlarda “jilovni tortishini” aytgan edi.
Ozodlik bilan ëzishgan mulozim iddaosiga ko‘ra, 10 yanvardan to 11 fevralga qadar O‘zbekiston Davlat Xavfsizlik Xizmatining yuzga yaqin xodimi ustidan jinoyat ishi ochilib, ehtiët chorasi sifatida qamoq qo‘llangan.
Mulozimlarning rasman tasdiqlanmagan iddaosiga ko‘ra, DXX tarafidan Mirziëev oila a’zolarining telefon so‘zlashmalari tinglangani va nazorat ostiga olingani bois Ixtiyor Abdullayev prezident uchun “istalmagan shaxsga” aylangan.
Ozodlik tasarrufida bu ma’lumotning rasmiy tasdig‘i ëki inkori hozircha yo‘q.
Ozodlik suhbatlashgan amaldorlar iddaosiga ko‘ra, prezident Mirziëev DXX ichidagi vaziyatni o‘z nazoratiga olish uchun joriy yil boshidan ilk qadamlarni qo‘ygan.
Prezident Shavkat Mirziyoyev o‘z qudasi Botir Tursunovni 2 fevral kuni Davlat Xavfsizlik Xizmati (DXX) raisining birinchi o‘rinbosari etib tayinlagani ham shu kontekstda ko‘riladi.
Bu haqda Ozodlikka ma’lum qilgan huquq-tartibot tizimlaridagi bir-biridan mustaqil bir nechta manbaga ko‘ra, general Botir Tursunov yangi vazifaga tayinlanarkan, dekabr oxirida bo‘shatilgan Jahongir Egamovning o‘rnini egallagan. Sobiq adliya maslahatchisi, Jahongir Egamov DXXda bor-yo‘g‘i o‘n bir oy muqaddam – 2018 yil fevralida ish boshlagan edi.
Ozodlik 46 yashar Jahongir Egamovga qarshi DXXning bir guruh yuqori lavozimli xodimlari qatorida “korrupsiya ishi figuranti” sifatida jinoyat ishi ochilgani haqida maqola e’lon qilgan edi.
Joriy yilning 11 fevralida internetdagi Eltuz.com nashri ustidan jinoyat ishi ochilib qamoqqa olingan DXX mulozimlari haqida ëzdi. Ayni nashr iddaosiga ko‘ra¸ “DXX sobiq raisining bojasi E.A., uning akasi E. H, DXX tergov boshqarmasi boshlig‘i A. A. va DXX raisining yaqin do‘sti U.A. bilan birga yana yuzga yaqin tezkor xodimlar” joriy yil yanvarida qamoqqa olingan.
Ozodlikning kuch ishlatar tizimlarida ishlaydigan manbasi ham “o‘nlab DXX xodimlari ustidan jinoyat ishi ochilgani” borasidagi ma’lumotni 11 fevral kuni tasdiqladi.
Unga ko‘ra¸ qamoqqa olingan DXX xodimlari O‘zbekiston Jinoyat Kodeksining 167-moddasi (“O‘zlashtirish yoki rastrata yo‘li bilan talon-toroj qilish”), 205-moddasi (“Hokimiyat yoki mansab vakolatini suiiste’mol qilish”), 210-modda (“Pora olish”) va 211-modda (“Pora berish”) ko‘zda tutgan jinoyatlarda gumon qilinmoqda.
Ozodlikning ayni masalada yuzasidan bergan savollariga O‘zbekiston Bosh prokuraturasi oldinroq “Bu borada rasmiy ma’lumot yo‘q”, deya javob bergan edi.
https://www.ozodlik.org
