Ўзбекистон ва ЕИ ҳамкорликни янгилаш бўйича музокара бошлади.O‘zbekiston va YeI hamkorlikni yangilash bo‘yicha muzokara boshladi.

(krıl va lotında)

Европа Иттифоқи (ЕИ) Ташқи ишлар ва хавфсизлик сиёсати бўйича олий вакили Федерика Могерини ва Ўзбекистон Ташқи ишлар вазири Абдулазиз Комиловлар 23 ноябрь куни Брюсселда музокара ўтказди.

ЕИ матбуот хизмати тарқатган баёнотда айтилишича, томонлар 2019 йилда имзоланиши кутилаётган янги ҳамкорликка оид келишув бўйича расмий музокараларни бошлаган.

Баёнотда таъкидланишича, асосан, сиёсий ҳамкорлик, савдо ва сармоявий алоқалар, инсон ҳуқуқлари ва бошқарув соҳасига оид ҳамкорликка қаратилган янги – ЕИ ва Ўзбекистон ўртасидаги кенгайтирилган шериклик ва ҳамкорлик ҳақидаги битим 1999 йилнинг 1 июлида имзоланган амалдаги битим ўрнини эгаллайди.

“Мен икки бора Ўзбекистонда бўлиб, мамлакатда олиб борилаётган кенг кўламли ислоҳотлар, шунингдек, Ўзбекистоннинг минтақадаги жараёнларда изчил, амалий иштирокига шахсан гувоҳ бўлдим. Янги келишув ўтказилаётган ислоҳотларни қўллашни давом эттириш, сиёсий-иқтисодий алоқаларни мустаҳкамлаш ва умумий муаммолар бўйича биргаликда ишлаш, Европа ва Ўзбекистон фуқаролари фаровонлигига ижобий ҳисса қўшишимизга имкон беради”, дея иқтибос келтирилади ЕИ комиссари Могеринидан, расмий баёнотда.

Томонлар ўртасидаги асосий музокаралар эса 2019 йилнинг бошига белгиланган.

ЕИнинг Ташқи ишлар бўйича олий вакили ва Ўзбекистон Ташқи ишлар вазири ўртасидаги музокаралар 23 ноябрь куни Брюсселда ўтган “Марказий Осиё – Европа иттифоқи” минтақалараро вазирлар учрашуви доирасида бўлиб ўтди.

Ушбу учрашувда ЕИнинг Марказий Осиё мамлакатларида қатор соҳаларни ривожлантириш учун 124 миллион евролик сармоя киритиш режаси эълон қилинди.

Учрашувни кузатган Turon24 нашри мухбирининг хабар қилишича, бу сумманинг 88 миллион евроси Қирғизистон, Қозоғистон, Тожикистон, Туркманистон ҳамда Ўзбекистонда хусусий сектор ва савдо-сотиқни ривожлантириш, атроф муҳитни муҳофаза қилиш бўйича минтақавий дастурларга йўналтирилади.

Шунингдек, ЕИнинг келгуси йили Туркманистонда ваколатхонасини очиш режаси маълум қилинган.

Yevropa Ittifoqi (YeI) Tashqi ishlar va xavfsizlik siyosati bo‘yicha oliy vakili Federika Mogerini va O‘zbekiston Tashqi ishlar vaziri Abdulaziz Komilovlar 23 noyabr kuni Bryusselda muzokara o‘tkazdi.

YeI matbuot xizmati tarqatgan bayonotda aytilishicha, tomonlar 2019 yilda imzolanishi kutilayotgan yangi hamkorlikka oid kelishuv bo‘yicha rasmiy muzokaralarni boshlagan.

Bayonotda ta’kidlanishicha, asosan, siyosiy hamkorlik, savdo va sarmoyaviy aloqalar, inson huquqlari va boshqaruv sohasiga oid hamkorlikka qaratilgan yangi – YeI va O‘zbekiston o‘rtasidagi kengaytirilgan sheriklik va hamkorlik haqidagi bitim 1999 yilning 1 iyulida imzolangan amaldagi bitim o‘rnini egallaydi.

“Men ikki bora O‘zbekistonda bo‘lib, mamlakatda olib borilayotgan keng ko‘lamli islohotlar, shuningdek, O‘zbekistonning mintaqadagi jarayonlarda izchil, amaliy ishtirokiga shaxsan guvoh bo‘ldim. Yangi kelishuv o‘tkazilayotgan islohotlarni qo‘llashni davom ettirish, siyosiy-iqtisodiy aloqalarni mustahkamlash va umumiy muammolar bo‘yicha birgalikda ishlash, Yevropa va O‘zbekiston fuqarolari farovonligiga ijobiy hissa qo‘shishimizga imkon beradi”, deya iqtibos keltiriladi YeI komissari Mogerinidan, rasmiy bayonotda.

Tomonlar o‘rtasidagi asosiy muzokaralar esa 2019 yilning boshiga belgilangan.

YeIning Tashqi ishlar bo‘yicha oliy vakili va O‘zbekiston Tashqi ishlar vaziri o‘rtasidagi muzokaralar 23 noyabr kuni Bryusselda o‘tgan “Markaziy Osiyo – Yevropa ittifoqi” mintaqalararo vazirlar uchrashuvi doirasida bo‘lib o‘tdi.

Ushbu uchrashuvda YeIning Markaziy Osiyo mamlakatlarida qator sohalarni rivojlantirish uchun 124 million yevrolik sarmoya kiritish rejasi e’lon qilindi.

Uchrashuvni kuzatgan Turon24 nashri muxbirining xabar qilishicha, bu summaning 88 million yevrosi Qirg‘iziston, Qozog‘iston, Tojikiston, Turkmaniston hamda O‘zbekistonda xususiy sektor va savdo-sotiqni rivojlantirish, atrof muhitni muhofaza qilish bo‘yicha mintaqaviy dasturlarga yo‘naltiriladi.

Shuningdek, YeIning kelgusi yili Turkmanistonda vakolatxonasini ochish rejasi ma’lum qilingan.

Ozodlık

Alakalı yazılar

Yorum yazın