(krıl va latın)
«Ўзбекозиқовқатхолдинг» холдинг компаниясида Ўзбекистонда етиштирилган мева-сабзавотлар, шу жумладан аччиқ қалампирларни хорижий давлатларга етказиб бериш борасида чет эллик тадбиркорлар билан музокара бўлиб ўтди. Компания раиси Тоҳир Жалилов Туркия ва Иорданиядан келган тадбиркорларга мамлакатда етиштирилаётган мева-сабзавотлар, шу жумладан кўплаб давлатларда талаб катта бўлган аччиқ қалампир етиштириш имконияти хусусида сўзлаб берди, деб хабар қилмоқда KUN.UZ мухбири.
Туркиялик Тожиддин Байроқ айни вақтда ўзбекистонлик ҳамкорлар билан 49 млн долларлик 35 минг тонна аччиқ қалампир (қуруқ ва ҳўл) етказиб берилиши борасида шартнома бўйича маҳсулот етказиб берилаётганини билдирди.
«Биз 35 минг тонна қалампирни бир-икки ой ичида олиб кетамиз. Бу борада ҳеч қандай муаммо кўраётганимиз йўқ. Келгуси йили мен бу миқдорни 200 минг тоннага чиқаришни режалаштирмоқдаман. Аммо, мени ташвишлантираётган нарса шуки, бу миқдордаги қалампир келаси йил узлуксиз ўз вақтида етказиб берилиши борасидаги кафолатдир. Чунки, мен бу қалампирни нафақат Туркияда сотаман, балки реэкспорт ҳам қиламан», – деди Тожиддин Байроқ.
«Ўзбекозиқовқатхолдинг» ХК раҳбари Тоҳир Жалилов бу йил 15 минг гектардан ортиқ ерга қалампир уруғлари қадалгани, шундан 189 минг тонна аччиқ қалампир ҳосилини йиғиб олиш ишлари айни пайтда ҳам давом этаётгани хусусида маълумот берди. Унинг айтишича, келгуси 2019 йилда аччиқ қалампир экиладиган майдонларни кенгайтириш режалаштирилмоқда. «Шунинг баробарида биз ҳам 200 минг тонна қалампирни аниқ харид қилиниши борасида қайсидир маънода кафолат бўлишини истаймиз», – деди Тоҳир Жалилов.
Иорданиядан келган меҳмонлар, Ўзбекистонда илк бор бўлиб турганларини таъкидлашар экан, бу ерда бизнес юритишга қизиқиб қолганларини қайд этишди. Улар нафақат аччиқ қалампир олди-сотдиси, балки бошқа соҳаларда ҳам тадбиркорлик қилиш имкониятларини кўриб чиқаётганини таъкидлашди.
«O‘zbekoziqovqatxolding» xolding kompaniyasida O‘zbekistonda yetishtirilgan meva-sabzavotlar, shu jumladan achchiq qalampirlarni xorijiy davlatlarga yetkazib berish borasida chet ellik tadbirkorlar bilan muzokara bo‘lib o‘tdi. Kompaniya raisi Tohir Jalilov Turkiya va Iordaniyadan kelgan tadbirkorlarga mamlakatda yetishtirilayotgan meva-sabzavotlar, shu jumladan ko‘plab davlatlarda talab katta bo‘lgan achchiq qalampir yetishtirish imkoniyati xususida so‘zlab berdi, deb xabar qilmoqda KUN.UZ muxbiri.
Turkiyalik Tojiddin Bayroq ayni vaqtda o‘zbekistonlik hamkorlar bilan 49 mln dollarlik 35 ming tonna achchiq qalampir (quruq va ho‘l) yetkazib berilishi borasida shartnoma bo‘yicha mahsulot yetkazib berilayotganini bildirdi.
«Biz 35 ming tonna qalampirni bir-ikki oy ichida olib ketamiz. Bu borada hech qanday muammo ko‘rayotganimiz yo‘q. Kelgusi yili men bu miqdorni 200 ming tonnaga chiqarishni rejalashtirmoqdaman. Ammo, meni tashvishlantirayotgan narsa shuki, bu miqdordagi qalampir kelasi yil uzluksiz o‘z vaqtida yetkazib berilishi borasidagi kafolatdir. Chunki, men bu qalampirni nafaqat Turkiyada sotaman, balki reeksport ham qilaman», – dedi Tojiddin Bayroq.
«O‘zbekoziqovqatxolding» XK rahbari Tohir Jalilov bu yil 15 ming gektardan ortiq yerga qalampir urug‘lari qadalgani, shundan 189 ming tonna achchiq qalampir hosilini yig‘ib olish ishlari ayni paytda ham davom etayotgani xususida ma’lumot berdi. Uning aytishicha, kelgusi 2019 yilda achchiq qalampir ekiladigan maydonlarni kengaytirish rejalashtirilmoqda. «Shuning barobarida biz ham 200 ming tonna qalampirni aniq xarid qilinishi borasida qaysidir ma’noda kafolat bo‘lishini istaymiz», – dedi Tohir Jalilov.
Iordaniyadan kelgan mehmonlar, O‘zbekistonda ilk bor bo‘lib turganlarini ta’kidlashar ekan, bu yerda biznes yuritishga qiziqib qolganlarini qayd etishdi. Ular nafaqat achchiq qalampir oldi-sotdisi, balki boshqa sohalarda ham tadbirkorlik qilish imkoniyatlarini ko‘rib chiqayotganini ta’kidlashdi.
Kun .uz
