(KRIL VA LOTINDA)
Бухоро аэропортида Россиянинг ашаддий ўнг қанот миллатчи партияси раҳбарини Ўзбекистон Сенати раисининг биринчи ўринбосари Содиқ Сафоев ва Бухоро вилоят ҳокими Ўктам Барноевлар кутиб олган.
Бу ҳақда Владимир Жириновский раҳбари бўлган ЛДПР партияси матбуот хизмати хабар бермоқда.
Ўзбек томони ҳозиргача Жириновский ва ЛДПР ҳайъатининг Ўзбекистонга ташрифи юзасидан ҳеч қандай расмий ахборот бермаган.
Жириновскийнинг ўзи чоршанба куни Би-би-си билан суҳбатда ташриф “ҳозирча маданий-оқартув” мақсадида экани, аммо ўзбек расмийлари билан юқори дажарадаги музокаралар эҳтимолини истисно қилмаслигини айтган эди.
У жумладан, Президент Шавкат Мирзиёев билан ҳам учрашишга умид қилаётганини билдирган.
Кейинроқ Тошкентга келиши кутилаётган Жириновскийнинг расмий учрашувларига доир маълумот йўқ.
ЛДПР веб-сайтидаги хабарда айтилишича, партия доҳийси Бухорода “Ситораи Моҳи Хосса” саройи ва шаҳардаги ҳунармандлик мактабларидан бирида бўлади ва бозорда оддий аҳоли билан мулоқот қилади.
ЛДПР ўз раҳбари ва депутатлари “Ўзбекистон тупроғида илиқ қаршилангани”ни айтган.
Хабарларга кўра, Бухородаги учрашувга журналистлар қўйилмаган.
Жириновский Бухорога Душанбедан учиб борган.
Тожикистонга сафари чоғида Президент Имомали Раҳмон билан ҳам кўришган зиддиятли сиёсатчи собиқ Иттифоқ республикалари Россияга “ихтиёрий қўшилиши” тарафдори эканлигини айтган.
ASIA-Plus нашри Жириновскийнинг “Мен Европа Иттифоқига ўхшаш иттифоқ тарафдориман. Мен бугунги кунда фақат 300 миллиондан ортиқ нуфузга эга давлатларгина яшаб қола олишига ишонаман”, дея Жириновскийнинг сўзларидан иқтибос келтирмоқда.
Жириновский 2010 йилда “Россия таркибида Ўрта Осиё федерал округи”ни тузишни таклиф қилган эди.
Бу Либерал -демократик партия доҳийсининг айни сифатда Ўзбекистонга илк ташрифидир.
Би-би-си билан суҳбатда Жириновский марҳум Ислом Каримов даврида ўзининг Ўзбекистонга боришига тақиқ қўйилмагани, унинг ўзи ўтмишда Ўзбекистон ва бошқа МДҲ давлатларини “назардан қочиргани”ни айтган.
Мухолифатдаги “Эрк” демократик партияси бир баёнот тарқатиб, Президент Шавкат Мирзиёев, ҳукуматни, парламент ва сенатни Жириновскийнинг Ўзбекистонга “қилиши мумкин бўлган ҳар қандай сафарини абадий тақиқлаш”га чақирган.
Ижтимоий тармоқларда фаоллар “рус шовинистининг Ўзбекистон тупроғига қадам босишидан” таассуфда эканликларини айтишган ва уни Бухорода “норозилик намойиши билан кутиб олишга” чақириқлар янграган.
Айрим ўзбеклар Жириновский ўзларини “Каримовнинг 25 миллион қўйи бор” дея ҳақоратлаганини айтишган.
Аммо Жириновскийнинг матбуот котиби Станислав Пахомов “ҳеч қачон бу каби баёнот бўлмагани ва бу гаплар ғирт ёлғон” эканини айтди.
У ўз раҳбарининг Ўзбекистонга ижобий кайфият ва режалар билан бораётганини таъкидлади.
Buxoro aeroportida Rossiyaning ashaddiy o‘ng qanot millatchi partiyasi rahbarini O‘zbekiston Senati raisining birinchi o‘rinbosari Sodiq Safoyev va Buxoro viloyat hokimi O‘ktam Barnoyevlar kutib olgan.
Bu haqda Vladimir Jirinovskiy rahbari bo‘lgan LDPR partiyasi matbuot xizmati xabar bermoqda.
O‘zbek tomoni hozirgacha Jirinovskiy va LDPR hay’atining O‘zbekistonga tashrifi yuzasidan hech qanday rasmiy axborot bermagan.
Jirinovskiyning o‘zi chorshanba kuni Bi-bi-si bilan suhbatda tashrif “hozircha madaniy-oqartuv” maqsadida ekani, ammo o‘zbek rasmiylari bilan yuqori dajaradagi muzokaralar ehtimolini istisno qilmasligini aytgan edi.
U jumladan, Prezident Shavkat Mirziyoyev bilan ham uchrashishga umid qilayotganini bildirgan.
Keyinroq Toshkentga kelishi kutilayotgan Jirinovskiyning rasmiy uchrashuvlariga doir ma’lumot yo‘q.
LDPR veb-saytidagi xabarda aytilishicha, partiya dohiysi Buxoroda “Sitorai Mohi Xossa” saroyi va shahardagi hunarmandlik maktablaridan birida bo‘ladi va bozorda oddiy aholi bilan muloqot qiladi.
LDPR o‘z rahbari va deputatlari “O‘zbekiston tuprog‘ida iliq qarshilangani”ni aytgan.
Xabarlarga ko‘ra, Buxorodagi uchrashuvga jurnalistlar qo‘yilmagan.
Jirinovskiy Buxoroga Dushanbedan uchib borgan.
Tojikistonga safari chog‘ida Prezident Imomali Rahmon bilan ham ko‘rishgan ziddiyatli siyosatchi sobiq Ittifoq respublikalari Rossiyaga “ixtiyoriy qo‘shilishi” tarafdori ekanligini aytgan.
ASIA-Plus nashri Jirinovskiyning “Men Yevropa Ittifoqiga o‘xshash ittifoq tarafdoriman. Men bugungi kunda faqat 300 milliondan ortiq nufuzga ega davlatlargina yashab qola olishiga ishonaman”, deya Jirinovskiyning so‘zlaridan iqtibos keltirmoqda.
Jirinovskiy 2010 yilda “Rossiya tarkibida O‘rta Osiyo federal okrugi”ni tuzishni taklif qilgan edi.
Bu Liberal -demokratik partiya dohiysining ayni sifatda O‘zbekistonga ilk tashrifidir.
Bi-bi-si bilan suhbatda Jirinovskiy marhum Islom Karimov davrida o‘zining O‘zbekistonga borishiga taqiq qo‘yilmagani, uning o‘zi o‘tmishda O‘zbekiston va boshqa MDH davlatlarini “nazardan qochirgani”ni aytgan.
Muxolifatdagi “Erk” demokratik partiyasi bir bayonot tarqatib, Prezident Shavkat Mirziyoyev, hukumatni, parlament va senatni Jirinovskiyning O‘zbekistonga “qilishi mumkin bo‘lgan har qanday safarini abadiy taqiqlash”ga chaqirgan.
Ijtimoiy tarmoqlarda faollar “rus shovinistining O‘zbekiston tuprog‘iga qadam bosishidan” taassufda ekanliklarini aytishgan va uni Buxoroda “norozilik namoyishi bilan kutib olishga” chaqiriqlar yangragan.
Ayrim o‘zbeklar Jirinovskiy o‘zlarini “Karimovning 25 million qo‘yi bor” deya haqoratlaganini aytishgan.
Ammo Jirinovskiyning matbuot kotibi Stanislav Paxomov “hech qachon bu kabi bayonot bo‘lmagani va bu gaplar g‘irt yolg‘on” ekanini aytdi.
U o‘z rahbarining O‘zbekistonga ijobiy kayfiyat va rejalar bilan borayotganini ta’kidladi.
ÖZBEK BBC
