Хоразмда пахтага оид йиғилишни ёритмоқчи бўлган журналист 7 суткага қамалди.Xorazmda paxtaga oid yig‘ilishni yoritmoqchi bo‘lgan jurnalist 7 sutkaga qamaldi

(krıl va lotında)

29 октябрь куни “Хоразм ёшлари” газетаси муҳаррирининг ўринбосари Давлат Назар майда безориликда айбланиб, 7 суткага қамалди.
Журналистнинг яқинларига кўра, Давлат Назар Қўшкўпир туман ҳокимлигининг пахта бўйича йиғилишини видеотасвирга олаётган пайтда олиб кетилган.
Ҳокимлик вакилларига кўра, журналист ширакайф бўлиб, йиғилишга ҳалақит қилгани учун уни судга беришган.
29 октябрь куни Хоразм вилояти, Қўшкўпир тумани маъмурий ишлар судида ўтган маҳкамада судья журналист Давлат Назарни Маъмурий-жавобгарлик кодексининг 183-моддаси яъни “Майда безорилик”да айбдор деб топиб, 7 суткага қамади.
Бу ҳақда Озодликка хабар берган журналистнинг яқинларидан бирига кўра, Давлат Назарни 29 октябрь куни эрталаб милиция ходимлари олиб кетган.
“У Ички ишлар ходимлари олиб кетаётган пайт менга хабар жўнатди. Хабарида уни орган ходимлари олиб кетаётганини айтиб, кечгача Фейсбукка бирорта пост қўймаса, демак, уни қамашган бўлишини ёзган. Уни репортаж олаётган жойидан олиб кетишган. У Хоразмда ўтаётган математика бўйича Халқаро Олимпиадани ёритаётган пайтида мелисалар келган ва олимпиаданинг ўзидан уни олиб кетишган”, деди журналистнинг яқинларидан бири.
Ўша куни тушдан кейин Қўшкўпир туман судида ўтган маҳкамада суд залидан Давлат Назарни қўлига кишан солиб, олиб кетишган.
Маҳкама тафсилотларидан хабардор журналистнинг дўстларидан бирининг айтишича, суд ярим соатча давом этган.
“Суд соат 16ларда бошланган ва ярим соатлардан кейин дарров тугаган. Унга адвокат ҳам беришмаган. Судда фақат гувоҳ сифатида Қўшкўпир туман ҳокимлиги вакиллари иштирок этган. Аввалига 15 сутка беришмоқчи бўлишган. Кейин 7 суткага туширишган. Суд залининг ўзида қўлига наручник солиб олиб кетишган”, деди маҳкама тафсилотларидан хабардор журналистнинг дўсти.
Журналистнинг яқинларига кўра, Давлат Назар 25 октябрь куни Қўшкўпир туман ҳокимлигида ўтган пахтага оид йиғилишни видеотасвирга олгани учун қамалган.
“Йиғилишда мактаб директорлари, докторлар, боғча мудираларини пахтага чиқариш масаласи кўрилган. Йиғилишдагилардан бири бу ҳақда Давлат Назарга хабар берган. У тўйда бўлган ва дарров ҳокимиятга етиб келган. Йиғилишга кириб, уни видеога олган. Йиғилиш тугагач, ҳаммага рухсат бериб юборишган ва Давлат Назарни мелисалар қўлга олган. Ўша ернинг ўзида уни олган видеоларини ўчириб ташлашган ва ўзини Урганчга олиб бориб, бир сутка ушлаб, эртасига қўйиб юборишган. Орадан 4 кун ўтиб, яна келиб уни олиб кетиб, қамашди”, дейди журналистнинг яқинларидан бири.
Қўшкўпир туман ҳокимлиги мулозимларидан бирига кўра, Давлат Назар ўша куни ширакайф бўлган ва йиғилишни ўтказишга ҳалақит қилгани учун уни судга беришган.
Давлат Назар тахаллуси билан ижод қилаётган қўшкўпирлик 47 яшар Давлатназар Рўзметов олдин “Ёшлар овози” газетасининг Хоразм вилояти бўйича мухбири бўлган.
Сўнгги йилларда эса “Хоразм ёшлари” газетасида фаолият юритиб келаяпти.
Жорий йил 29 майда ўтган видеоселектор йиғилишида президент Шавкат Мирзиёев жорий йил пахта мавсумида мажбурий меҳнат мутлақо қўлланилмаслиги шарт эканини айтди.
Бироқ жорий йил ҳам пахта мавсумида мажбурий меҳнат ҳолатлари кузатилмоқда.
Озодликка бўлаётган мурожаатларга кўра, ўқитувчилар, шифокорлар ва бошқа бюджет ташкилотлари ходимлари пахтага мажбуран чиқарилаяпти. Бу ҳақда PaxtaGram саҳифасида батафсил танишасиз

29 oktyabr kuni “Xorazm yoshlari” gazetasi muharririning o‘rinbosari Davlat Nazar mayda bezorilikda ayblanib, 7 sutkaga qamaldi.
Jurnalistning yaqinlariga ko‘ra, Davlat Nazar Qo‘shko‘pir tuman hokimligining paxta bo‘yicha yig‘ilishini videotasvirga olayotgan paytda olib ketilgan.
Hokimlik vakillariga ko‘ra, jurnalist shirakayf bo‘lib, yig‘ilishga halaqit qilgani uchun uni sudga berishgan.
29 oktyabr kuni Xorazm viloyati, Qo‘shko‘pir tumani ma’muriy ishlar sudida o‘tgan mahkamada sudya jurnalist Davlat Nazarni Ma’muriy-javobgarlik kodeksining 183-moddasi ya’ni “Mayda bezorilik”da aybdor deb topib, 7 sutkaga qamadi.
Bu haqda Ozodlikka xabar bergan jurnalistning yaqinlaridan biriga ko‘ra, Davlat Nazarni 29 oktyabr kuni ertalab militsiya xodimlari olib ketgan.
“U Ichki ishlar xodimlari olib ketayotgan payt menga xabar jo‘natdi. Xabarida uni organ xodimlari olib ketayotganini aytib, kechgacha Feysbukka birorta post qo‘ymasa, demak, uni qamashgan bo‘lishini yozgan. Uni reportaj olayotgan joyidan olib ketishgan. U Xorazmda o‘tayotgan matematika bo‘yicha Xalqaro Olimpiadani yoritayotgan paytida melisalar kelgan va olimpiadaning o‘zidan uni olib ketishgan”, dedi jurnalistning yaqinlaridan biri.
O‘sha kuni tushdan keyin Qo‘shko‘pir tuman sudida o‘tgan mahkamada sud zalidan Davlat Nazarni qo‘liga kishan solib, olib ketishgan.
Mahkama tafsilotlaridan xabardor jurnalistning do‘stlaridan birining aytishicha, sud yarim soatcha davom etgan.
“Sud soat 16larda boshlangan va yarim soatlardan keyin darrov tugagan. Unga advokat ham berishmagan. Sudda faqat guvoh sifatida Qo‘shko‘pir tuman hokimligi vakillari ishtirok etgan. Avvaliga 15 sutka berishmoqchi bo‘lishgan. Keyin 7 sutkaga tushirishgan. Sud zalining o‘zida qo‘liga naruchnik solib olib ketishgan”, dedi mahkama tafsilotlaridan xabardor jurnalistning do‘sti.
Jurnalistning yaqinlariga ko‘ra, Davlat Nazar 25 oktyabr kuni Qo‘shko‘pir tuman hokimligida o‘tgan paxtaga oid yig‘ilishni videotasvirga olgani uchun qamalgan.
“Yig‘ilishda maktab direktorlari, doktorlar, bog‘cha mudiralarini paxtaga chiqarish masalasi ko‘rilgan. Yig‘ilishdagilardan biri bu haqda Davlat Nazarga xabar bergan. U to‘yda bo‘lgan va darrov hokimiyatga yetib kelgan. Yig‘ilishga kirib, uni videoga olgan. Yig‘ilish tugagach, hammaga ruxsat berib yuborishgan va Davlat Nazarni melisalar qo‘lga olgan. O‘sha yerning o‘zida uni olgan videolarini o‘chirib tashlashgan va o‘zini Urganchga olib borib, bir sutka ushlab, ertasiga qo‘yib yuborishgan. Oradan 4 kun o‘tib, yana kelib uni olib ketib, qamashdi”, deydi jurnalistning yaqinlaridan biri.
Qo‘shko‘pir tuman hokimligi mulozimlaridan biriga ko‘ra, Davlat Nazar o‘sha kuni shirakayf bo‘lgan va yig‘ilishni o‘tkazishga halaqit qilgani uchun uni sudga berishgan.
Davlat Nazar taxallusi bilan ijod qilayotgan qo‘shko‘pirlik 47 yashar Davlatnazar Ro‘zmetov oldin “Yoshlar ovozi” gazetasining Xorazm viloyati bo‘yicha muxbiri bo‘lgan.
So‘nggi yillarda esa “Xorazm yoshlari” gazetasida faoliyat yuritib kelayapti.
Joriy yil 29 mayda o‘tgan videoselektor yig‘ilishida prezident Shavkat Mirziyoyev joriy yil paxta mavsumida majburiy mehnat mutlaqo qo‘llanilmasligi shart ekanini aytdi.
Biroq joriy yil ham paxta mavsumida majburiy mehnat holatlari kuzatilmoqda.
Ozodlikka bo‘layotgan murojaatlarga ko‘ra, o‘qituvchilar, shifokorlar va boshqa byudjet tashkilotlari xodimlari paxtaga majburan chiqarilayapti. Bu haqda PaxtaGram sahifasida batafsil tanishasiz

Ozodlık