Нобель мукофоти совриндори – туркиялик Азиз Санжар Ўзбекистонда. Nobel mukofoti sovrindori – turkiyalik Aziz Sanjar O‘zbekistonda

(KRIL VA LOTINDA)

Ўзбекистондаги ўқув жараёнларига етакчи хорижий олимларни жалб қилиш мақсадларида Ўзбекистон Миллий Университети ҳамда Олий ва ўрта махсус таълим вазирлиги ташаббуси билан кимё бўйича Нобель мукофоти совриндори, жаноб Азиз Санжар Ўзбекистонга ташриф буюрди. Бугун, 15 октябрь куни Ўзбекистон Республикаси Бош вазир ўринбосари Азиз Абдуҳакимов туркиялик Нобель мукофоти совриндори Азиз Санжар билан учрашди.
Шунингдек Олий ва ўрта махсус таълим вазирлиги раҳбари Ином Мажидов ҳам олим билан музокаралар ўтказди.
Ўзбекистон томон машҳур олимнинг юртимизга ташрифи ёшларимизнинг илмий тадқиқот ишларига бўлгани қизиқиши ортишида, уларнинг ўз олдига аниқ мақсадлар қўйиб, танлаган соҳасида ижобий ютуқларга эришишида сезиларли туртки бўлишини қайд этди.
Ўз навбатида, жаноб Азиз Санжар Ўзбекистонда ўзини Она-Ватанидагидек ҳис қилаётгани, ўзига берилган Нобель мукофоти бутун туркий халқлар мукофоти деб ҳисоблашини алоҳида таъкидлади. Шунингдек, таниқли олим ўзбек алломаларининг жаҳон цивилизациясига қўшган бебаҳо ҳиссасини эътироф этар экан, илм-фан тараққиёти фундаментал тадқиқотлар билан узвий боғлиқлигини қайд этди.
Туркиялик олим, Шимолий Каролина Университети (АҚШ) биокимё ва биофизика фанлари профессори 15-22 октябрь кунлари Ўзбекистонда бўлиб, Миллий Университетнинг ёш мутахассислари, бакалавр, магистрант ва докторантлари учун маърузалар ўқийди, шунингдек молекуляр биология соҳасида мутахассислар билан тажриба алмашади. Бундан ташқари, у республикамиз ёш олимларини илмий-тадқиқот ва инновацион фаолиятга жалб қилади.
Жаноб Санжар Азизнинг Тошкентга ташрифи вақтида унинг шунингдек Туркия Республикасининг Ўзбекистондаги фавқулодда ва мухтор элчиси Аҳмад Башар Шен, Миллий Университет ректори А.Мараҳимов, ТИКАнинг Ўзбекистондаги ваколатхонаси раҳбари Али Исхан Чағлар билан учрашувлар ўтказиши режалаштирилган.
Нобель мукофоти совриндори ташрифи давомида Ўзбекистон Миллий Университети молекуляр биология соҳалараро қўшма лабораториясининг очилиш маросимида иштирок этади.
Бундан ташқари, 18-21 октябрь кунлари Азиз Санжар Ўзбекистоннинг тарихий шаҳарлари – Хива, Урганч, Бухоро ва Самарқандда бўлади ҳамда у ерларда ҳам ёш олимлар билан учрашади.
Шуни алоҳида таъкидлаш жоизки, бу – жорий йилнинг ўзида иккинчи Нобель мукофоти совриндорининг Ўзбекистонга ташриф буюриши. Бундан аввал KUN.UZ’да Нобель мукофоти совриндори Рёдзи Ноёрининг Ўзбекистонга ташрифи ҳақида маълумот берилган эди.
Ноёри ўзбекистонлик талабалар билан мулоқот қилиб, илм-фаннинг сўнгги ютуқлари, ўз ҳаётий тажрибаси ва илмий натижалари билан ўртоқлашган.

O‘zbekistondagi o‘quv jarayonlariga yetakchi xorijiy olimlarni jalb qilish maqsadlarida O‘zbekiston Milliy Universiteti hamda Oliy va o‘rta maxsus ta’lim vazirligi tashabbusi bilan kimyo bo‘yicha Nobel mukofoti sovrindori, janob Aziz Sanjar O‘zbekistonga tashrif buyurdi. Bugun, 15 oktyabr kuni O‘zbekiston Respublikasi Bosh vazir o‘rinbosari Aziz Abduhakimov turkiyalik Nobel mukofoti sovrindori Aziz Sanjar bilan uchrashdi.
Shuningdek Oliy va o‘rta maxsus ta’lim vazirligi rahbari Inom Majidov ham olim bilan muzokaralar o‘tkazdi.
O‘zbekiston tomon mashhur olimning yurtimizga tashrifi yoshlarimizning ilmiy tadqiqot ishlariga bo‘lgani qiziqishi ortishida, ularning o‘z oldiga aniq maqsadlar qo‘yib, tanlagan sohasida ijobiy yutuqlarga erishishida sezilarli turtki bo‘lishini qayd etdi.
O‘z navbatida, janob Aziz Sanjar O‘zbekistonda o‘zini Ona-Vatanidagidek his qilayotgani, o‘ziga berilgan Nobel mukofoti butun turkiy xalqlar mukofoti deb hisoblashini alohida ta’kidladi. Shuningdek, taniqli olim o‘zbek allomalarining jahon sivilizatsiyasiga qo‘shgan bebaho hissasini e’tirof etar ekan, ilm-fan taraqqiyoti fundamental tadqiqotlar bilan uzviy bog‘liqligini qayd etdi.
Turkiyalik olim, Shimoliy Karolina Universiteti (AQSh) biokimyo va biofizika fanlari professori 15-22 oktyabr kunlari O‘zbekistonda bo‘lib, Milliy Universitetning yosh mutaxassislari, bakalavr, magistrant va doktorantlari uchun ma’ruzalar o‘qiydi, shuningdek molekulyar biologiya sohasida mutaxassislar bilan tajriba almashadi. Bundan tashqari, u respublikamiz yosh olimlarini ilmiy-tadqiqot va innovatsion faoliyatga jalb qiladi.
Janob Sanjar Azizning Toshkentga tashrifi vaqtida uning shuningdek Turkiya Respublikasining O‘zbekistondagi favqulodda va muxtor elchisi Ahmad Bashar Shen, Milliy Universitet rektori A.Marahimov, TIKAning O‘zbekistondagi vakolatxonasi rahbari Ali Isxan Chag‘lar bilan uchrashuvlar o‘tkazishi rejalashtirilgan.
Nobel mukofoti sovrindori tashrifi davomida O‘zbekiston Milliy Universiteti molekulyar biologiya sohalararo qo‘shma laboratoriyasining ochilish marosimida ishtirok etadi.
Bundan tashqari, 18-21 oktyabr kunlari Aziz Sanjar O‘zbekistonning tarixiy shaharlari – Xiva, Urganch, Buxoro va Samarqandda bo‘ladi hamda u yerlarda ham yosh olimlar bilan uchrashadi.
Shuni alohida ta’kidlash joizki, bu – joriy yilning o‘zida ikkinchi Nobel mukofoti sovrindorining O‘zbekistonga tashrif buyurishi. Bundan avval KUN.UZ’da Nobel mukofoti sovrindori Ryodzi Noyorining O‘zbekistonga tashrifi haqida ma’lumot berilgan edi.
Noyori o‘zbekistonlik talabalar bilan muloqot qilib, ilm-fanning so‘nggi yutuqlari, o‘z hayotiy tajribasi va ilmiy natijalari bilan o‘rtoqlashgan.

KUN.UZ

Alakalı yazılar

Yorum yazın