(krıl ve latında)
Шавкат Мирзиёев Ал-Азҳар мажмуаси раҳбарини қабул қилди.
Ўзбекистон Республикаси президенти Шавкат Мирзиёев 11 октябрь куни юртимизга ташриф билан келган Миср Бош имоми, Ал-Азҳар мажмуаси раҳбари шайх Аҳмад Муҳаммад Таййибни қабул қилди. Бу ҳақда президент матбуот хизмати хабар бермоқда.
Давлат раҳбари меҳмонни қутлар экан, Миср президенти Абдулфаттоҳ ас-Сисининг шу йил 4-5 сентябрь кунлари Ўзбекистонга амалга оширган расмий ташрифи икки томонлама муносабатларни ривожлантириш йўлида тарихий қадам бўлганини қайд этди.
Бугунги кунда муқаддас ислом динининг бағрикенглик тамойилларини, маърифий қадриятларини тарғиб этиш, унинг инсонпарварлик моҳиятини сақлаш, диний-маънавий меросни тадқиқ этиш, турли хавф-хатарларга қарши курашиш борасида Ўзбекистон ва Мисрда катта ишлар қилинаётгани учрашувда баён этилди.
Хусусан, «Жаҳолатга қарши маърифат» билан курашиш тамойили асосида исломнинг эзгу ғояларини замондошларимизга, биринчи навбатда ёшларга етказиш мақсадида Тошкентда Ўзбекистон халқаро ислом академияси, Ислом цивилизацияси маркази, Самарқандда Имом Бухорий халқаро илмий-тадқиқот маркази ташкил этилди.
Давлат раҳбари Ал-Азҳар университети билан имзоланган ҳамкорлик меморандумлари диний уламолар, олимлар, малакали профессор-ўқитувчилар ва иқтидорли талабалар алмашувини йўлга қўйишда муҳим аҳамиятга эга эканини таъкидлади.
Ал-Азҳар ўз таркибида ислом тадқиқотлари академияси, университет, маъҳадлар, жоме масжиди, бир қанча илмий марказларни бирлаштирган йирик расмий диний мажмуа ҳисобланади.
Миср Бош имоми Шавкат Мирзиёевга самимий қабул учун чуқур миннатдорчилик изҳор этар экан, Миср президенти Абдулфаттоҳ ас-Сисининг самимий саломлари ва эзгу тилакларини етказди.
Аҳмад Таййиб Ўзбекистон Республикаси президенти томонидан ҳаётнинг барча жабҳаларида амалга оширилаётган кенг миқёсли ислоҳотларни юқори баҳолади.
Ўзбекистонда ислом динининг асл моҳиятини ўрганиш ва тарғиб қилиш, диний-маънавий меросни кенг тадқиқ этиш борасида олиб борилаётган сиёсатни, БМТда илгари сурган қатор ташаббусларини тўлиқ қўллаб-қувватлашини айтди.
У ислом дини равнақига катта ҳисса қўшган Имом Бухорий, Имом Термизий, Имом Мотуридий, Абу Муин Насафий, Маҳмуд Замахшарий сингари буюк уламоларнинг бебаҳо илмий меросини биргаликда ўрганиш муҳим эканлигини қайд этди.
Шайх Аҳмад Таййиб Ўзбекистон халқаро ислом академиясининг биринчи фахрий профессори унвони берилгани ўзи учун катта шараф ва эҳтиром экани ҳамда масъулият бағишлашини билдирди.
Аҳмад Таййиб Халқаро ислом академияси таркибида Ал-Азҳар университети кафедрасини ташкил этиш, мисрлик таниқли олимларнинг юртимизда дарс бериши, Ал-Азҳар магистратурасида талаба ва ёш олимларимизнинг имтиёзли таҳсил олиши, икки давлат уламоларининг қўшма Фатво ҳайъатини тузиш ҳамда биргаликда илмий анжуманларни ва қўшма тадбирларни ўтказиш бўйича таклифларни қўллаб-қувватлади.
Юқори мартабали диний арбоб Ўзбекистон билан муносабатларни нафақат таълим ва гуманитар соҳаларда, балки барча жабҳаларда изчил ривожлантириш ва янги босқичга олиб чиқиш йўлида Миср томонининг саъй-ҳаракатлари қатъийлигига ишонч билдирди.
Shavkat Mirziyoyev Al-Azhar majmuasi rahbarini qabul qildi
O‘zbekiston Respublikasi prezidenti Shavkat Mirziyoyev 11 oktyabr kuni yurtimizga tashrif bilan kelgan Misr Bosh imomi, Al-Azhar majmuasi rahbari shayx Ahmad Muhammad Tayyibni qabul qildi. Bu haqda prezident matbuot xizmati xabar bermoqda.
Davlat rahbari mehmonni qutlar ekan, Misr prezidenti Abdulfattoh as-Sisining shu yil 4-5 sentyabr kunlari O‘zbekistonga amalga oshirgan rasmiy tashrifi ikki tomonlama munosabatlarni rivojlantirish yo‘lida tarixiy qadam bo‘lganini qayd etdi.
Bugungi kunda muqaddas islom dinining bag‘rikenglik tamoyillarini, ma’rifiy qadriyatlarini targ‘ib etish, uning insonparvarlik mohiyatini saqlash, diniy-ma’naviy merosni tadqiq etish, turli xavf-xatarlarga qarshi kurashish borasida O‘zbekiston va Misrda katta ishlar qilinayotgani uchrashuvda bayon etildi.
Xususan, «Jaholatga qarshi ma’rifat» bilan kurashish tamoyili asosida islomning ezgu g‘oyalarini zamondoshlarimizga, birinchi navbatda yoshlarga yetkazish maqsadida Toshkentda O‘zbekiston xalqaro islom akademiyasi, Islom sivilizatsiyasi markazi, Samarqandda Imom Buxoriy xalqaro ilmiy-tadqiqot markazi tashkil etildi.
Davlat rahbari Al-Azhar universiteti bilan imzolangan hamkorlik memorandumlari diniy ulamolar, olimlar, malakali professor-o‘qituvchilar va iqtidorli talabalar almashuvini yo‘lga qo‘yishda muhim ahamiyatga ega ekanini ta’kidladi.
Al-Azhar o‘z tarkibida islom tadqiqotlari akademiyasi, universitet, ma’hadlar, jome masjidi, bir qancha ilmiy markazlarni birlashtirgan yirik rasmiy diniy majmua hisoblanadi.
Misr Bosh imomi Shavkat Mirziyoyevga samimiy qabul uchun chuqur minnatdorchilik izhor etar ekan, Misr prezidenti Abdulfattoh as-Sisining samimiy salomlari va ezgu tilaklarini yetkazdi.
Ahmad Tayyib O‘zbekiston Respublikasi prezidenti tomonidan hayotning barcha jabhalarida amalga oshirilayotgan keng miqyosli islohotlarni yuqori baholadi.
O‘zbekistonda islom dinining asl mohiyatini o‘rganish va targ‘ib qilish, diniy-ma’naviy merosni keng tadqiq etish borasida olib borilayotgan siyosatni, BMTda ilgari surgan qator tashabbuslarini to‘liq qo‘llab-quvvatlashini aytdi.
U islom dini ravnaqiga katta hissa qo‘shgan Imom Buxoriy, Imom Termiziy, Imom Moturidiy, Abu Muin Nasafiy, Mahmud Zamaxshariy singari buyuk ulamolarning bebaho ilmiy merosini birgalikda o‘rganish muhim ekanligini qayd etdi.
Shayx Ahmad Tayyib O‘zbekiston xalqaro islom akademiyasining birinchi faxriy professori unvoni berilgani o‘zi uchun katta sharaf va ehtirom ekani hamda mas’uliyat bag‘ishlashini bildirdi.
Ahmad Tayyib Xalqaro islom akademiyasi tarkibida Al-Azhar universiteti kafedrasini tashkil etish, misrlik taniqli olimlarning yurtimizda dars berishi, Al-Azhar magistraturasida talaba va yosh olimlarimizning imtiyozli tahsil olishi, ikki davlat ulamolarining qo‘shma Fatvo hay’atini tuzish hamda birgalikda ilmiy anjumanlarni va qo‘shma tadbirlarni o‘tkazish bo‘yicha takliflarni qo‘llab-quvvatladi.
Yuqori martabali diniy arbob O‘zbekiston bilan munosabatlarni nafaqat ta’lim va gumanitar sohalarda, balki barcha jabhalarda izchil rivojlantirish va yangi bosqichga olib chiqish yo‘lida Misr tomonining sa’y-harakatlari qat’iyligiga ishonch bildirdi.
kun.uz
12.10.2018
