Мирзиёев Обидхон қорини оқлайдими?

(krıl va lotında)

25.06.2018

Ўзбекистон Ички ишлар вазирлиги расмий веб сайтидаги “Қидирувдаги шахслар” рўйхатидан таниқли уламо Обидхон қори Назаров ҳақидаги маълумотлар олиб қўйилган.

Маълумотларнинг қачон олингани санаси маълум эмас.

Би-би-си ҳозирча бу ҳақда Ички ишлар вазирлигидан расмий шарҳ ололгани йўқ.

Яқинларига кўра, Тошкентдаги “Тўхтабой” масжидининг собиқ имоми ҳақида ИИВ сайтидаги маълумотлар ўтган йил охирида янгиланган, жумладан, унинг эски сурати ўрнига Швецияда олинган сурати жойлаштирилганди.

Айни пайтда Обидхон қорининг 2004 йил ёзида бедарак кетган ўғли Ҳусниддин Назаров ҳануз Ички ишлар вазирлигининг “Бедарак йўқолганлар” рўйхатида.

Обидхон қори суиқасдига буйруқ берганларни қидириш тўхтатилди

Обидхон қорига суиқасд уюштиришда гумонланган ўзбеклар оқланган

Довудхон Назаров: ‘Ҳозиргача ҳам биз билан қизиқишган’

Би-би-сига маълум бўлишича, Ўзбекистон ҳукумати Обидхон қорини ватанига қайтариш ҳаракатида бўлиши мумкин.

Собиқ адвокати Ирина Микулинанинг айтишича, Ўзбекистон Адлия вазирлигидаги манбаъ Обидхон қори Назаровдан барча айбловларнинг олиб ташланганини айтган, аммо буни тасдиқловчи биронта ҳужжат кўрсатмаган.

Обидхон қори Назаров 1996 йилда диний идора сиёсати билан келишмагани учун имомликдан четлатилган. Икки йиллик таъқиблардан сўнг ҳибсга олиниш таҳдиди остида Ўзбекистонни тарк этган.

Ўзбекистон ҳукумати уни диний-экстремистик ташкилот раҳбари сифатида қидирувга берган.

2006 йилда Швециядан сиёсий бошпана олган Обидхон қорининг яқинлари ватанга қайтиш борасида ҳокимият вакиллари томонидан ўзларига ишоралар бўлганини тасдиқлашмоқда.

Умид ва қайтиш
Ўзбекистонда сиёсий ва диний мухолифларга нисбатан сиёсатнинг юмшаши сиёсий таъқиблардан қочган хориждаги минглаб ўзбек муҳожирлари орасида ватанга қайтиш умидларини пайдо қилган.

Аммо ҳозиргача ватанига қайтган бир неча киши ҳибсга олинган.

Улардан энг сўнггиси- АҚШ фуқароси Зокир Алиев ватанида терроризм айбларига юз тутган.

Собиқ адвокат Микулинанинг ишонишича, Ўзбекистон ҳукумати муҳожиротдаги кўзга кўринган сиёсий ва диний муҳожирларнинг ватанга қайтиши борасида ҳануз бир қарорга келгани йўқ.

Обидхон қори Назаров муқаддам Интерполнинг ҳам қидирув рўйхатида бўлган, аммо 2012 йил февралида Швециянинг Стромсунд шаҳрида юз берган қотиллик уриниши арафасида бу рўйхатдан чиқарилганди.

Яқинлари суиқасд ортида ўзбек махсус хизматлари турганини иддао қилишади.

Суиқасддан омон қолган Обидхон қори узоқ вақт комада ва шифокорлар назоратида бўлган.

Швеция аппеляция маҳкамаси суиқасдда айбланган Юрий Жуковскийни 2016 йилда умрбод қамоқ жазосига маҳкум этган.

Швед расмийлари қотиллик буюртмачисининг исмини очиқлашмаган.

Уларга кўра, Интерполнинг Ўзбекистондаги идораси суиқасд буюртмачисининг 2017 йил мартида вафот этганини айтган.

Mirziyoyev Obidxon qorini oqlaydimi?
O‘zbekiston Ichki ishlar vazirligi rasmiy veb saytidagi “Qidiruvdagi shaxslar” ro‘yxatidan taniqli ulamo Obidxon qori Nazarov haqidagi ma’lumotlar olib qo‘yilgan.

Ma’lumotlarning qachon olingani sanasi ma’lum emas.

Bi-bi-si hozircha bu haqda Ichki ishlar vazirligidan rasmiy sharh ololgani yo‘q.

Yaqinlariga ko‘ra, Toshkentdagi “To‘xtaboy” masjidining sobiq imomi haqida IIV saytidagi ma’lumotlar o‘tgan yil oxirida yangilangan, jumladan, uning eski surati o‘rniga Shvetsiyada olingan surati joylashtirilgandi.

Ayni paytda Obidxon qorining 2004 yil yozida bedarak ketgan o‘g‘li Husniddin Nazarov hanuz Ichki ishlar vazirligining “Bedarak yo‘qolganlar” ro‘yxatida.

Obidxon qori suiqasdiga buyruq berganlarni qidirish to‘xtatildi

Obidxon qoriga suiqasd uyushtirishda gumonlangan o‘zbeklar oqlangan

Dovudxon Nazarov: ‘Hozirgacha ham biz bilan qiziqishgan’

Bi-bi-siga ma’lum bo‘lishicha, O‘zbekiston hukumati Obidxon qorini vataniga qaytarish harakatida bo‘lishi mumkin.

Sobiq advokati Irina Mikulinaning aytishicha, O‘zbekiston Adliya vazirligidagi manba’ Obidxon qori Nazarovdan barcha ayblovlarning olib tashlanganini aytgan, ammo buni tasdiqlovchi bironta hujjat ko‘rsatmagan.

Obidxon qori Nazarov 1996 yilda diniy idora siyosati bilan kelishmagani uchun imomlikdan chetlatilgan. Ikki yillik ta’qiblardan so‘ng hibsga olinish tahdidi ostida O‘zbekistonni tark etgan.

O‘zbekiston hukumati uni diniy-ekstremistik tashkilot rahbari sifatida qidiruvga bergan.

2006 yilda Shvetsiyadan siyosiy boshpana olgan Obidxon qorining yaqinlari vatanga qaytish borasida hokimiyat vakillari tomonidan o‘zlariga ishoralar bo‘lganini tasdiqlashmoqda.

Umid va qaytish
O‘zbekistonda siyosiy va diniy muxoliflarga nisbatan siyosatning yumshashi siyosiy ta’qiblardan qochgan xorijdagi minglab o‘zbek muhojirlari orasida vatanga qaytish umidlarini paydo qilgan.

Ammo hozirgacha vataniga qaytgan bir necha kishi hibsga olingan.

Ulardan eng so‘nggisi- AQSh fuqarosi Zokir Aliyev vatanida terrorizm ayblariga yuz tutgan.

Sobiq advokat Mikulinaning ishonishicha, O‘zbekiston hukumati muhojirotdagi ko‘zga ko‘ringan siyosiy va diniy muhojirlarning vatanga qaytishi borasida hanuz bir qarorga kelgani yo‘q.

Obidxon qori Nazarov muqaddam Interpolning ham qidiruv ro‘yxatida bo‘lgan, ammo 2012 yil fevralida Shvetsiyaning Stromsund shahrida yuz bergan qotillik urinishi arafasida bu ro‘yxatdan chiqarilgandi.

Yaqinlari suiqasd ortida o‘zbek maxsus xizmatlari turganini iddao qilishadi.

Suiqasddan omon qolgan Obidxon qori uzoq vaqt komada va shifokorlar nazoratida bo‘lgan.

Shvetsiya appelyatsiya mahkamasi suiqasdda ayblangan Yuriy Jukovskiyni 2016 yilda umrbod qamoq jazosiga mahkum etgan.

Shved rasmiylari qotillik buyurtmachisining ismini ochiqlashmagan.

Ularga ko‘ra, Interpolning O‘zbekistondagi idorasi suiqasd buyurtmachisining 2017 yil martida vafot etganini aytgan.

bbc o’zbek

Alakalı yazılar

Yorum yazın