Яхши бир жараён-Yahshi bir jarayon (Кирил ва Lotinda)

Дарёнинг тириклиги оқиши билан дейдилар. Дарҳақиқат, дарё оқмаса у ботқоқликка айланади, ҳамма нарсанинг тозаланишига восита бўладиган сувнинг ўзи ҳам чирийди. Оқиб турган дарё ўзини ўзи ва бошқаларни тозалагани каби, балиқларга ва бошқа сувда яшайдиган жонзотларга уй макон, тупроқда унадиган ўсимликларга эса жон бўлади…

Дарёнинг оқиб туриши мана шундай тирик бир жараёндир…
Биз ўзбеклар ҳам алҳамдулиллаҳ Ислом Каримовнинг 26 йиллик диктатурасига қарамай ўлганимиз йўқ. Бу диктатарага қарши доимо овозимиз чиқиб турди, уни фош қилишга ва унга қарши қўлимиздан келганича курашишга ҳаракат қилдик.

Бугун Каримов ёлғон ва мунофиқона сайлов ўйинлари билан халқимизни ҳам, дунё жамоатчилигини ҳам алдаб, уларни бир тийинга қиммат инсонлар ўрнида кўриб, қайтадан тахтга ўтирмоқчи. Тахтига қайта ўтирадими, йўқми уни фақат Аллоҳ таоло билади. Чунки кечагина тупроқ остига кетган Суадия қироли ҳам абадий тахтимда ўтираман, дейдиганлардан эди. Бугун эса унинг манзили кимсасиз қабр бўлди…

Лекин ҳаёт тўхтагани йўқ. Ҳаёт худди дарё каби бир жараёндир. Ўзбек халқи ҳам ўлгани йўқ. Бу кунларда оз бўлса ҳам халқимизнинг тириклигини билдирадиган яхши хабарлар келмоқда. Улардан бир нечтасини сизлар билан баҳам кўрмоқчиман:

1. “Озодлик” радиосида Олмалиқликдан Гулчеҳра опа деган аёл Каримов диктатурасига қарши унча мунча мухолифлар айтмолмайдиган гапларни айтдилар. Бу оддий ўзбек аёли, бундайлар ватанимизда миллионларчадир. Марҳамат ўзингиз ўқиб эшитиб кўринг:
http://www.ozodlik.org/content/article/26810931.html

2. Ўтган кунларда биз “Халқаро Туркистонликлар Ҳамкорлик Жамияти” Ўзбекистондаги режимнинг мамлакат ичкарисида ва ташқарисида қилаётган жиноятларига қарши Истанбулда намойиш ўтказдик. Намойишга мингга яқин ҳамюртларимиз ва маҳаллий жамоатчилик вакиллари қатнашдилар. Бу мухолифатнинг мустақиллик йилларидан кейинги ўтган деярли чорак аср давомида амалга оширган энг катта норозилик намойиши эди. Бу ҳақда “Озодлик” ва ББС ўзбек хизматлари хабар тарқатишди. Жамиятимиз ва ўтказган намойишимиз ҳақида маълумотларни www.turkistanlilar.org саҳифамиздан ўрганишингиз мумкин.

3. Бир гуруҳ мухолифатчилар Ўзбекистондаги сохта сайловларни фош қилиш учун интернет тармоғида “Виртуал Президентлик Сайлови” гуруҳини тузишибди. Ташаббусчилар орасида таниқли мухолифатчилар Мўътабар Тожибоева,Муҳаммадсолиҳ Абутов, Улуғбек Бакиров, мустақил сиёсатшунос Камолиддин Роббимов ва бошқалар бор. Эътибор берилса, бу мухолифатчилар орасида аниқ Исломий қарашлари бўлганлар ҳам, аниқ демократия тарафдори бўлганлар ҳам бор. Яъни, бу икки бир биридан фарқли эътиқодий ва амалий гуруҳларнинг вакиллари бир орага келиб, қўлларидан келганича Ислом Каримов диктатурасига қарши ҳаракат қилишга бел боғлашибди. Менимча мусулмонларнинг уларга хайрихоҳ бўлган бундай гуруҳлар билан биргаликда ҳаракат қилишларида монеълик бўлмаса керак. Яъни, мусулмон мусулмонлигича қолсин, демократ демократлигича қолсин ва эътиқод ва амаллар имкон берган даражада биргаликда ҳаракат қилинсин. Бу қоида албатта ўзларини Ислом дини душманлари деб эълон қилган Абдураҳим Пўлатов, Галима Бухорбоева, “Мен Шарлиман”, деб севгили пайғамбаримиз Муҳаммад (сав)га қилинган ҳақоратларга қўшилган номи журналист ўзи шайтонист “радикал демократларга” тааллуқли эмасдир. Ислом дини ва мусулмонлар улар билан тинч тотув яшайдиган тоифалар билан ўзаро шартнома асосида тинч жамият доирасида яшай оладилар. Бу масалага алоҳида тўхталашимнинг сабаби эса Ўзбекистонимизнинг келажаги учун энг муҳим ижтмиоий сиёсий омиллар Ислом дини, демократия тушунчаси ва миллатчилик масаласи бўлишидир. Шундай экан, бу ижтимоий гуруҳлар вакилларининг ҳозирданоқ ўзаро мулоқот ва умумий тинч жамият қуришнинг пойдеворини ўрнатиб боришлари ўта муҳимдир. Мисол учун ўзимизнинг Туркия аҳолисининг 99% мусулмон дейилсада, аслида 70% га яқини ўзини мусулмон ва Ислом дини тарафдори деб биладиганлар, 30% га яқини эса ўзларини секуряр (лаик) демократия тарафдори деб биладиганлардан иборат. Бунинг устига Турк ва Курд миллатчилиги тарафдорлари ҳам бор. Охирги 30 йилда Курд миллатчиларининг исёни натижасида Туркияда 40 мингга яқин киши ўлди, мамлакат иқтисодига энг камида 500 миллиард доллар зарар берилди. Шундай экан, биз ҳозирдан мусулмонлар билан ўзларини демократ деб атайдиган, айни замонда мусулмонларга қарши ҳурмат билан қарайдиган тоифалар, шунингдек ўзбеклар, тожиклар, қозоқлар, қирғизлар, туркманлар, руслар орасида тинч тотув ҳаётнинг эътиқодий, фикрий ва амалий илдизларини ўрната бошлашимиз керак…
“Виртуал Президентлик Сайлови” гуруҳининг фаолияти билан мана бу ерда танишишингиз мумкин:
https://saylov2015.wordpress.com/

4. Хориждаги ҳамюртларимиз ичида энг танилган сайтлардан бири “Дунё ўзбеклари” сайтидир. Бу сайтга ва унинг муаллифи Исмат Хушевга ҳам ҳар ким хил муносабатда бўлиши мумкин. Аммо унинг Ўзбекистон Бош Вазири Шавкат Мирзиёевни фош қилувчи мақолалари ва айниқса куни кеча бўлиб ўтган Олий Мажлисида бир депутатнинг Шавкат Мирзиёевнинг қайтадан Бош Вазир бўлишига қарши овоз берганлиги ҳақидаги хабари фақатгина журналистик сенсация эмас, ҳаммамиз “Ура” деб олқишлайдиган бир хушхабар ҳамдир. Кесакдан ўт чиқибди деганларидек, Ўзбекистон Олий Мажлисида Каримовдан кейин Ўзбекистоннинг янги диктатори дея ҳозирдан машҳур бўла бошлаган “робот” Бош Вазир Шавкат Мирзиёвнинг золимлигини фош қилиш албатта халқимизнинг манфаатигадир. Тегишли хабарни мана бу ердан ўқишингиз мумкин:
http://dunyouzbeklari.com/archives/93161

5. “Озодлик” радиосида 2014 йилда энг машҳур хабарлардан бири санъаткор “Озода Саидзода: Бош вазир Мирзиёевни судга бераман!” (http://www.ozodlik.org/content/article/26767468.html) хабари экан. Албатта, бу амалга ошдими йўқми буни билмаймиз. Аммо бундай хабарлар Ўзбекистондаги зулм бутун ижтимоий табақалар, яъни оддий меҳнакашлару зиёлилар, диндорлару санъаткорлар ҳамма ҳамманнинг жонига текканига далилдир. Эндиги масала эса озодлик, имон ва тараққиёт йўлида биргалишиб ҳаракат қилишимиз ва бу савобли жараёнга ҳаммамизнинг ўз ҳиссамизни қўшишимиздадир.

Аллоҳ рози бўлсин!

Намоз НОРМЎМИН
“Халқаро Туркистонликлар Ҳамкорлик Жамияти” Раиси ўринбосари
25.01.2015

YAXSHI BIR JARAYON

Daryoning tirikligi oqishi bilan deydilar. Darhaqiqat, daryo oqmasa u botqoqlikka aylanadi, hamma narsaning tozalanishiga vosita bo‘ladigan suvning o‘zi ham chiriydi. Oqib turgan daryo o‘zini o‘zi va boshqalarni tozalagani kabi, baliqlarga va boshqa suvda yashaydigan jonzotlarga uy makon, tuproqda unadigan o‘simliklarga esa jon bo‘ladi…
Daryoning oqib turishi mana shunday tirik bir jarayondir…

Biz o‘zbeklar ham alhamdulillah Islom Karimovning 26 yillik diktaturasiga qaramay o‘lganimiz yo‘q. Bu diktataraga qarshi doimo ovozimiz chiqib turdi, uni fosh qilishga va unga qarshi qo‘limizdan kelganicha kurashishga harakat qildik.

Bugun Karimov yolg‘on va munofiqona saylov o‘yinlari bilan xalqimizni ham, dunyo jamoatchiligini ham aldab, ularni bir tiyinga qimmat insonlar o‘rnida ko‘rib, qaytadan taxtga o‘tirmoqchi. Taxtiga qayta o‘tiradimi, yo‘qmi uni faqat Alloh taolo biladi. Chunki kechagina tuproq ostiga ketgan Suadiya qiroli ham abadiy taxtimda o‘tiraman, deydiganlardan edi. Bugun esa uning manzili kimsasiz qabr bo‘ldi…

Lekin hayot to‘xtagani yo‘q. Hayot xuddi daryo kabi bir jarayondir. O‘zbek xalqi ham o‘lgani yo‘q. Bu kunlarda oz bo‘lsa ham xalqimizning tirikligini bildiradigan yaxshi xabarlar kelmoqda. Ulardan bir nechtasini sizlar bilan baham ko‘rmoqchiman:
1. “Ozodlik” radiosida Olmaliqlikdan Gulchehra opa degan ayol Karimov diktaturasiga qarshi uncha muncha muxoliflar aytmolmaydigan gaplarni aytdilar. Bu oddiy o‘zbek ayoli, bundaylar vatanimizda millionlarchadir. Marhamat o‘zingiz o‘qib eshitib ko‘ring:

http://www.ozodlik.org/content/article/26810931.html

2. O‘tgan kunlarda biz “Xalqaro Turkistonliklar Hamkorlik Jamiyati” O‘zbekistondagi rejimning mamlakat ichkarisida va tashqarisida qilayotgan jinoyatlariga qarshi Istanbulda namoyish o‘tkazdik. Namoyishga mingga yaqin hamyurtlarimiz va mahalliy jamoatchilik vakillari qatnashdilar. Bu muxolifatning mustaqillik yillaridan keyingi o‘tgan deyarli chorak asr davomida amalga oshirgan eng katta norozilik namoyishi edi. Bu haqda “Ozodlik” va BBS o‘zbek xizmatlari xabar tarqatishdi. Jamiyatimiz va o‘tkazgan namoyishimiz haqida ma’lumotlarni www. turkistanlilar.orgsahifamizdan o‘rganishingiz mumkin.

3. Bir guruh muxolifatchilar O‘zbekistondagi soxta saylovlarni fosh qilish uchun internet tarmog‘ida “Virtual Prezidentlik Saylovi” guruhini tuzishibdi. Tashabbuschilar orasida taniqli muxolifatchilar Mo‘’tabar Tojiboyeva,Muhammadsolih Abutov, Ulug‘bek Bakirov, mustaqil siyosatshunos Kamoliddin Robbimov va boshqalar bor. E’tibor berilsa, bu muxolifatchilar orasida aniq Islomiy qarashlari bo‘lganlar ham, aniq demokratiya tarafdori bo‘lganlar ham bor. Ya’ni, bu ikki bir biridan farqli e’tiqodiy va amaliy guruhlarning vakillari bir oraga kelib, qo‘llaridan kelganicha Islom Karimov diktaturasiga qarshi harakat qilishga bel bog‘lashibdi. Menimcha musulmonlarning ularga xayrixoh bo‘lgan bunday guruhlar bilan birgalikda harakat qilishlarida mone’lik bo‘lmasa kerak. Ya’ni, musulmon musulmonligicha qolsin, demokrat demokratligicha qolsin va e’tiqod va amallar imkon bergan darajada birgalikda harakat qilinsin. Bu qoida albatta o‘zlarini Islom dini dushmanlari deb e’lon qilgan Abdurahim Po‘latov, Galima Buxorboyeva, “Men Sharliman”, deb sevgili payg‘ambarimiz Muhammad (sav)ga qilingan haqoratlarga qo‘shilgan nomi jurnalist o‘zi shaytonist “radikal demokratlarga” taalluqli emasdir. Islom dini va musulmonlar ular bilan tinch totuv yashaydigan toifalar bilan o‘zaro shartnoma asosida tinch jamiyat doirasida yashay oladilar. Bu masalaga alohida to‘xtalashimning sababi esa O‘zbekistonimizning kelajagi uchun eng muhim ijtmioiy siyosiy omillar Islom dini, demokratiya tushunchasi va millatchilik masalasi bo‘lishidir. Shunday ekan, bu ijtimoiy guruhlar vakillarining hozirdanoq o‘zaro muloqot va umumiy tinch jamiyat qurishning poydevorini o‘rnatib borishlari o‘ta muhimdir. Misol uchun o‘zimizning Turkiya aholisining 99% musulmon deyilsada, aslida 70% ga yaqini o‘zini musulmon va Islom dini tarafdori deb biladiganlar, 30% ga yaqini esa o‘zlarini sekuryar (laik) demokratiya tarafdori deb biladiganlardan iborat. Buning ustiga Turk va Kurd millatchiligi tarafdorlari ham bor. Oxirgi 30 yilda Kurd millatchilarining isyoni natijasida Turkiyada 40 mingga yaqin kishi o‘ldi, mamlakat iqtisodiga eng kamida 500 milliard dollar zarar berildi. Shunday ekan, biz hozirdan musulmonlar bilan o‘zlarini demokrat deb ataydigan, ayni zamonda musulmonlarga qarshi hurmat bilan qaraydigan toifalar, shuningdek o‘zbeklar, tojiklar, qozoqlar, qirg‘izlar, turkmanlar, ruslar orasida tinch totuv hayotning e’tiqodiy, fikriy va amaliy ildizlarini o‘rnata boshlashimiz kerak…
“Virtual Prezidentlik Saylovi” guruhining faoliyati bilan mana bu yerda tanishishingiz mumkin:
https://saylov2015.wordpress.com/

4. Xorijdagi hamyurtlarimiz ichida eng tanilgan saytlardan biri “Dunyo o‘zbeklari” saytidir. Bu saytga va uning muallifi Ismat Xushevga ham har kim xil munosabatda bo‘lishi mumkin. Ammo uning O‘zbekiston Bosh Vaziri Shavkat Mirziyoyevni fosh qiluvchi maqolalari va ayniqsa kuni kecha bo‘lib o‘tgan Oliy Majlisida bir deputatning Shavkat Mirziyoyevning qaytadan Bosh Vazir bo‘lishiga qarshi ovoz berganligi haqidagi xabari faqatgina jurnalistik sensatsiya emas, hammamiz “Ura” deb olqishlaydigan bir xushxabar hamdir. Kesakdan o‘t chiqibdi deganlaridek, O‘zbekiston Oliy Majlisida Karimovdan keyin O‘zbekistonning yangi diktatori deya hozirdan mashhur bo‘la boshlagan “robot” Bosh Vazir Shavkat Mirziyovning zolimligini fosh qilish albatta xalqimizning manfaatigadir. Tegishli xabarni mana bu yerdan o‘qishingiz mumkin:
http://dunyouzbeklari.com/archives/93161

5. “Ozodlik” radiosida 2014 yilda eng mashhur xabarlardan biri san’atkor “Ozoda Saidzoda: Bosh vazir Mirziyoyevni sudga beraman!” (http://www.ozodlik.org/content/article/26767468.html) xabari ekan. Albatta, bu amalga oshdimi yo‘qmi buni bilmaymiz. Ammo bunday xabarlar O‘zbekistondagi zulm butun ijtimoiy tabaqalar, ya’ni oddiy mehnakashlaru ziyolilar, dindorlaru san’atkorlar hamma hammanning joniga tekkaniga dalildir. Endigi masala esa ozodlik, imon va taraqqiyot yo‘lida birgalishib harakat qilishimiz va bu savobli jarayonga hammamizning o‘z hissamizni qo‘shishimizdadir.

Alloh rozi bo‘lsin!
Namoz NORMO‘MIN
“Xalqaro Turkistonliklar Hamkorlik Jamiyati” Raisi o‘rinbosari
25.01.2015

Alakalı yazılar

Yorum yazın